Сотқа дейінгі тергеу барысында күдіктіге алаяқтықтың 11 эпизоды бойынша кінә тағылып, дәлелденген. Жәбірленушілерге келтірілген материалдық залал шамамен 1 млн теңгеге бағаланады.
«Түркістан облысының 28 жастағы тұрғыны бірнеше ай бойы елордадағы пәтерлерді жалға беру туралы жалған хабарландырулар орналастырғаны анықталды. Жарнамаларда ол нарықтық бағадан төмен баға қойған және асығыс екенін, пәтер жалдағысы келетіндердің көптігін сылтауратып алдын-ала төлемді талап еткен. Оны ұялы аударым арқылы алған. Мәселен, былтырғы қараша айында Krisha KZ қосымшасы арқылы жалған хабарландыру жариялап, Қабанбай батыр даңғылы мекенжайы бойынша пәтерді жалға беру сылтауымен елорда тұрғынын алдап, 110 мың теңге көлемінде қаражатын иемденген», - деп жазды қалалық полиция департаментінің баспасөз қызметі.
Күдікті қамауға алынды, ҚК 190-бабы 2-бөлігі (алаяқтық) бойынша тергеу жүргізілуде. Қазіргі уақытта қалған жәбірленушілер анықталуда.
