Халықаралық менеджментті дамыту институтының (IMD, Лозанна, Швейцария) Әлемдік бәсекеге қабілеттілікті зерттеу орталығы 2023 жылғы Әлемдік бәсекеге қабілеттілік рейтингінің нәтижелерін жариялады. Бұл туралы ҚР Ұлттық экономика министрлігі хабарлады.
IMD рейтингі келесі факторларды бағалайтын кешенді зерттеудің нәтижесі болып табылады: «Экономикалық қызмет», «Үкіметтің тиімділігі», «Бизнестің тиімділігі» және «Инфрақұрылым».
2023 жылғы зерттеу нәтижелері бойынша Қазақстан Республикасы 2022 жылғы рейтингпен салыстырғанда 6 тармаққа көтеріліп, 66,1 балл нәтижесімен 37-орынға ие болды.
2023 жылы зерттеуде әлемнің 64 елі бағаланды. Рейтингте жетекші орынға Дания ие. Даниядан кейін топ-5 елдің қатарына Ирландия, Швейцария, Сингапур және Нидерланды кіреді.
