Испанияның Кордова қаласында 16 жасқа дейінгілер арасында Billie Jean King Juniors Finals турнирін Қазақстан қыздар құрамасы жеңіспен бастады.
Бұл туралы Қазақстан теннис федерациясы хабарлады.
Фото: ktf.kz
Марат Шәріповтің шәкірттері алғашқы кездесуінде Аргентина командасын жеңді.
Алдымен Полина Слепцова (224 ITF Juniors ranking) мен Соль Айлин (117 ITF Juniors ranking) кортқа шықты.
Тартысты матч қазақстандық теннисшінің пайдасына аяқталды – 7:6 (9:7), 6:3.
Екінші ойында Анастасия Крымкова (576 ITF Juniors ranking) Жозефина Эстевистен (271 ITF Juniors ranking) 6:1, 3:6, 6:1 есебімен айласын асырды.
Жұптық сында Іңкәр Дүйсебай мен Анастасия Крымкова қарсыластарына есе жіберді - 5:7, 6:4, 10:12.
Жалпы есеп – 2:1, Қазақстанның пайдасында.
Командалық әлем чемпионатының В тобында Ұлыбритания мен Қазақстан құрамалары алда келеді.
Ұлыбританиялықтар бразилиялықтарды 3:0 есебімен ұтты.
