ҚР Ұлттық қауіпсіздік комитеті төрағасының орынбасары Руслан Сейсембаев лаңкестік және экстремистік ұйымдардың әлеуметтік желілерді өз мүддесі үшін пайдалану қаупі туралы айтты, деп хабарлайды ҚазАқпарат тілшісі.
«Халықты радикалдандырудың тағы бір маңызды факторы - терроризмді интернет арқылы насихаттау. Интернетті қолданушылардың белсенділігі терроризм мен экстремизм идеологтерінің үгіт-насихат жұмысын жүргізуге жағдай жасап отыр. Бүгінде бұл – әсіресе жастарды радикалдандырудың негізгі факторы. Цифрлы ортада халықаралық террористік ұйымдар халыққа деструктивті ақпараттық насихат жүргізіп, психологиялық әсер етуі үшін пайдаланатын желілік инфрақұрылым құрылды», - деді Руслан Сейсембаев елордада өтіп жатқан ШЫҰ кеңесінің 40-шы отырысында.
Оның айтуынша, сараптамалық бағалауларға сәйкес, интернетте жұмыс істейтін 10 мыңға дейін экстремистік электронды алаң бар.
«Әлеуметтік желілер мен мессенджерлер арқылы деректер алмасу, экстремистік материалдарды тарату, сондай-ақ террористік қызметті басқару құрылады. Өкінішке қарай, ең осал және террористік қауіпке жиі ұшырайтын санат – жастар. Тек биыл ғана Қазақстанда деструктивті қауымдастықтардағы жастар арасынан 80 мыңға жуық желі пайдаланушысы анықталды. Олардың ішінде 6 мыңға жуығы 18 жасқа толмаған. Бұл мәселені шешу үшін ШЫҰ елдерінде терроризмге қарсы ақпараттық-насихаттық іс-қимыл жұмысын одан әрі жетілдіре түсу қажет», - деп толықтырды спикер.
