Халықаралық балаларды қорғау күнінде Бейбітшілік және келісім сарайында алғашқы республикалық «Aiala» арт-эко фестивалі өтеді.
Бұл туралы мәдениет және ақпарат министрлігінің баспасөз қызметі хабарлады.
Оны Мәдениет және ақпарат министрлігі, «Азаматтық бастамаларды қолдау орталығы» КЕАҚ ұйымдастырады. Бас демеуші - «Халық» қайырымдылық қоры.
Фестиваль еліміздің түкпір-түкпірінен келген оқушылар үшін өнер арқылы қоршаған ортаға қамқорлық көрсетуге мүмкіндік берді.
Бір айдың ішінде 200-ден астам оқушы 6 санат бойынша экология тақырыбында қызықты жұмыстар жасай отырып, өздерінің таланттары мен шығармашылықтарын көрсетті:
▪️Beınele – бейнелеу өнері (фото, кескіндеме);
▪️Árle – перфоманс (мүсін және инсталляция);
▪️Qara – видео түсіру (фильмдер, роликтер) ;
▪️Sezin – арт перфоманс (театр, көше перфоманстары, флешмобтар) ;
▪️Sóıle – музыка және поэзия (әндер, өлеңдер) ;
▪️Órnekte – сәндік-қолданбалы өнер (тоқыма, керамика бұйымдары).
Қазір 36 финалистің есімдері белгілі. Бірақ жеңімпаздар 1 маусым– Халықаралық балаларды қорғау күнінде жарияланады.
Сондай-ақ фестиваль аясында киіз басу, кескіндеме, қаржылық сауаттылық және макулатурадан панно жасау бойынша шеберлік сыныптары өтеді.
Балаларға арнап интерактивті ойын-сауық, кейтеринг ұйымдастырылып, мерчтер сатылады. Одан түскен қаражат экологиялық қорларға аударылады.
Іс-шараның арнайы қонағы ретінде «JOLDA» би театры шақырылған.
