17 мыңнан астам салымшы 27 млрд теңгеден асып түсетін ақшаны қаржы пирамидаларына салған, деп хабарлайды ҚазАқпарат тілшісі ҚР Қаржы мониторингі агенттігінің баспасөз қызметі ұсынған мәліметке сүйене отырып.
«Биылғы жылдың 5 айында қаржы мониторингі органы ҚР ҚК 217-бабы (қаржы пирамидасын құру және оған басшылық ету) бойынша 24 қаржы пирамидасы әрекетіне қатысты сотқа дейінгі тергеп-тексеру амалын жүргізді. Аталған фактілер бойынша қаржы пирамидаларына 17 мыңнан астам салымшы 27 млрд теңгеден астам қаражат құйғаны белгілі болды», - делінген ресми ақпаратта.
Сондай-ақ, агенттік қаржы пирамидасын ұйымдастыру бойынша күдікке ілінген компанияларға қатысты артық мәліметтің берілмейтінін ескертеді.
«ҚР Қылмыстық-процестік кодексінің 201-бабына сәйкес сотқа дейінгі тергеп-тексеруге қатысты деректерді жария етуге болмайды. Деректер тергеу мүддесіне қайшы келмеген және басқа адамдардың құқығы мен заңды мүддесін бұзбаған жағдайда прокурордың рұқсатымен ғана жария етілуі мүмкін», - дейді ведомстводан.
Еске сала кетсек, Қазақстанда қаржы пирамидаларының жарнамасы үшін қылмыстық жауапкершілік енгізу жоспарланып отыр.
ҚР Ішкі істер министрлігінің мәліметінше жыл басынан бері қаржы пирамидаларының үстінен 27 қылмыстық іс қозғалған.
