Бүгін дүниежүзі Қазақстандағы «Қазанат» атшабарына назар салып отыр. V Дүниежүзілік Көшпенділер ойынының бәйге жарыстары соңғы күнге қойылды.
Суреттер автордан / Дәл қазір, Астана қаласы
Кеше көкпар деп ақ тер, көкбөрі деп көк тер болған халық бүгін қолына намыстың қамшысын алып, бәйге көруге келді. Келсе келгендей. Себебі ұшқыр бәйге, жорға жарыстан кейін құнандар, одан кейін аламан бәйгенің арғымақтары шығады.
Аламан – бәйгеден гөрі, майданға ұқсайды. Себебі, қазақ даласының дарабоздары Жұмыртұяқ, Талхиз, Мамайқара секілді сәйгүліктермен бірге қырғыздың атышулы Қарақызы бір жарыс жолында шабады.
Ерекше екпін қойғымыз келетіні, Көшпенділер ойындарының бәйгесіне Батыс Қазақстаннан үш бірдей шабандоз атқа қонады. Олар Айсұлтан Миразат, Ырысбек Рашид және Мерей Ғарифуллин.
Дүниежүзілік додаға лайықты жокей шыққаны – Батыс Қазақстан облыстық «Бәйге» федерациясының жылдар бойғы еңбегінің жемісі.
Бауыржан Ширмединұлы
zhaikpress.kz
