Дәстүрлі «Қазақстан Барысы» турнирінің облыстық іріктеу кезеңі жоғары деңгейде өтті. Додаға аудандық және қалалық кезеңдердің жеңімпазы атанған 25 палуан қатысты. Еліміздің басты боз кілем бәсекесіне жолдама алу үшін жан алысып, жан беріскен апайтөстер айқасы тартысты өтті.
Жарыс басында палуанларға облыстық дене шынықтыру және спорт басқармасының басшысы Бақдаулет Сәбитов сәттілік тіледі.
- Өңірдің ең мықты палуандары бас қосып, еліміздегі басты күрес додасына жолдаманы сарапқа салуда. Бабы мен бағы қатар шапқан шын мықты жеңіске жетсін. Бүгінгі Жайық барысының жеңісті жолы басты бәсекеде жалғасын тапсын, - деді Бақдаулет Маратұлы.
Күрестің көрігін қыздырған палуандардың әр белдесуі жанкүйерлерді серпілтті. Тәжірибелі төрешілер қазылық еткен жарыс барысында қатысушылардың дайындығы мен шеберлігі ерекше байқалды.
Нәтижесінде казталовтық Бекайдар Меңдешев жеңімпаз атанды. Ал Тасқала ауданы атынан белдескен Эльнар Жанболатұлы екінші орын иеленді. Енді Бекайдар мен Эльнар «Қазақстан барысы» турнирінің республикалық кезеңінде облыс намысын қорғайды. Одан бөлек үшінші орынға шыңғырлаулық Құсайын Ерболатов қол жеткізді.
Айта кетейік қазақ күресінің елдегі басты бәсекесі қазанның 18-і күні Астанада өтеді.
Түгелбай Бисен,
«Орал өңірі»
