Еліміздегі кейбір жоғары оқу орындары Мемлекет басшысының оқытушылар жалақысын көтеру тапсырмасын орындамай отыр. Бұл туралы ҚР Білім және ғылым министрі Асхат Аймағамбетов айтты.
«Жалақыны 25 пайызға өсіру тапсырмасы болған еді. Университеттердің басым көпшілігі бұл тапсырманы дұрыс деңгейде орындады. Кейбір университеттер толық орындамаған. Осы университеттердің Директорлар кеңесі төрағаларына тапсырма беремін. Алдымыздағы ең бірінші Директорлар кеңесінің отырысында қарап, тиісті шешім қабылдап, бұл мәселені жабу керек. Әсіресе педагогикалық бағытта білім беретін университеттер. Педагогикалық университеттерде жалақының өсуі басқа университтерге қарағанда әлдеқайда көбірек болуы тиіс. Неге? Өйткені Президенттің тапсырмасы бойынша осы педагогикалық университеттерде оқу құны, бюджеттен беріліп отырған гранттың құны басқа университеттермен салыстырғанда көбірек», – деді Асхат Аймағамбетов министрліктің аппарат кеңесінде.
Министрдің айтуынша, бұл өз кезегінде педагогикалық мамандықтар бойынша жалақының өсуіне мүмкіндік береді. «Мұны да дұрыс түсіндіруіміз керек. Жалпы педагог мәртебесі бойынша да жалақының өскені бәріне белгілі. Қаңтар айынан бастап 25 пайызға артты. Қыркүйек айында да жалақының біраз өсімі байқалды. Келесі жылы қаңтарда да көтеріледі. Мұның барлығы Президент тапсырмасының аясында орын алып жатыр. Бұл білім басқармасына әлде министрлікке не басқа тұлғаларға байланысты мәселе емес. Мемлекет басшысының алдыңғы жылы тамыз кеңесінде берген тапсырмасы аясында бюджеттен қырауар қаражат бөлінуде», – деді ол.
zhaikpress.kz
Батыс Қазақстанның маңызды жаңалықтарын біздің Instagram-дағы парақшамыздан және Telegram арнамыздан алғашқы болып біліңіздер
