Бүгін Қадыр Мырза Әлі орталығында салтанатты жиын өтіп, ел Тәуелсіздігінің 25 жылдығына орай бірқатар мәдениет және өнер саласының қызметкерлері мен ардагерлеріне құрмет көрсетілді. Шараға өңір басшысы Алтай Көлгінов арнайы қатысты.
Алдымен облыс әкімі Алтай Көлгінов сөз алып, тәуелсіздік жылдары мәдениет саласында қол жеткізген жетістіктер мен атқарылған жұмыстарға тоқталып өтті.
- Биылғы жыл табысқа толы жыл болды. Алдағы жылы да үлкен жұмыстар күтіп тұр. Біз өнер адамдарымен мақтанамыз. Соның дəлелі, Батыс Қазақстан облысының өнерпаздары өзге облыстармен салыстырғанда қай жағынан болсын алда келеді. Сондықтан өзге салалармен қатар мəдениет саласына да үлкен көңіл бөліп келеміз. Соның бір дəлелі келер жылы мəдени нысандарды жаңғыртуға 100 млн теңге қаржы бөлінеді. Еліміздің 25 жылдық мерейтойына орай жаңа ауданда жаңа алаң ашылды, үйлер, көптеген əлеуметтік нысандар бой көтерді. Бұлардың барлығы тəу етер тəуелсіздігіміздің жемісі,- деп атап өтті өңір басшысы.
Бұдан кейін өңір басшысы ел тәуелсіздігінің ширек ғасырлық мерейтойына орай бірқатар сала үздіктерін түрлі наградалармен марапаттады. ҚР Президентінің Жарлығы бойынша Ғ.Құрманғалиев атындағы Батыс Қазақстан облыстық филармониясының әншісі Дастан Есентеміров «Ерен еңбегі үшін» медалімен наградталды. Ал облыстық мәдениет, архивтер және құжаттама басқармасы басшысының орынбасары Вячеслав Иночкин мен облыстық қазақ драма театрының ұжымы облыс әкімінің Құрмет грамотасына, бірқатар мәдениет саласының мақтаныштары облыс әкімінің алғыс хаттарына ие болды. ҚР Мәдениет және спорт министрінің бұйрығы бойынша «Мәдениет саласының үздігі» төсбелгісімен Сырым аудандық орталықтандырылған кітапханасының директоры Раушан Хасанова, Федоровка ауылдық орталықтандырылған кітапханасының директоры Марина Лұқманова, Шыңғырлау аудандық орталықтандырылған кітапханасының директоры Гүлсім Қуанаева, Құрманғазы атындағы саз колледжінің халық аспаптары бөлімінің меңгерушісі Асылғаным Құсмағанбетова наградталды. Ал көп жылдар бойы мәдениет саласын басқарған, қазірде «Салалық мәдениет спорт және ақпарат қызметкерлерінің кәсіптік одағы» бірлестігінің төрағасы Айдар Батырхановқа ҚР Мәдениет және спорт министрінің алғыс хаты табысталды.
Салтанатты жиында бұдан бөлек ҚР Ұлттық кітапханасының «Кітапхана ісінің ардагері» және "Кітапхана ісінің үздігі» төсбелгілерімен, «Салалық мәдениет спорт және ақпарат қызметкерлерінің кәсіптік одағы» қоғамдық бірлестігінің «Құрмет белгісі» төсбелгісімен, облыстық мәдениет, архивтер және құжаттама басқармасының алғыс хаттары табыс етілді.
Ләззат ШАҒАТАЙ
Суретті түсірген Темірболат ТОҚМАМБЕТОВ
