Биылғы жылғы 8 желтоқсанда Орал қалалық мәслихатының құрамынан шығып қалған депутаттардың орнына сайлау өтпек.
Бүгінде бірмандаттық аумақтық сайлау округтері бойынша қалалық мәслихаттарының депутаттығына кандидаттарды тіркеу жүргізіліп жатыр. Бұл туралы Орал қалалық аумақтық сайлау комиссиясы хабарлады.
Орал қаласы бойынша №11, №16, №23 аумақтық сайлау округтерінде комиссиялар жұмыс жасап, депутаттыққа үміті барлардан құжаттар қабылданып жатыр.
– Жалпы №23 округтік сайлау комиссиясына қалалық мәслихат депутаттығына бес үміткер өз өтініштерін ұсынған. 5 қараша күні бір кандидат өз өтініші бойынша сайлауға түсуден бас тартты. Бүгінде округтік сайлау комиссиясы толық құраммен жұмысын жалғастырып, үміткерлерді тіркеуді жүзеге асыруда, - деді №23 округтік сайлау комиссиясының төрағасы Жазира Бисалиева.
Сондай-ақ №11 округтік сайлау комиссиясына 8 адам өтініш берген. Бір үміткердің қалалық мәслихат депутаттығына сайлауға түсуге сәйкес еместігі анықталып, екі кандидат өз еріктерімен бас тартқан. Дәл қазір бұл сайлау округінде 5 үміткер ұсынылған.
Ал №16 округтік сайлау комиссиясына үш өтініш түскен болса, оның біреуі күні бүгінге құжаттарын толық тапсырмаған.
Айта кетейік, бірмандаттық аумақтық сайлау округтері бойынша қалалық мәслихаттарының депутаттығына кандидаттарды тіркеу 8 қараша күнгі сағат 18:00-ге дейін жүргізіледі.
