«Жұмыспен қамтудың жол картасы» бағдарламасы ауқымында Теректі ауданы Долинное ауылындағы Чапаев мектебінің ғимараты күрделі жөнделуде. Бүгін облыс әкімі Ғали Есқалиев ғимаратты күрделі жөндеп жатқан «Фирма ИСКОМ» ЖШС-ның жұмысымен танысты.
Былтыр аудан әкімінің есептік кездесуіне қатысқан облыс басшысына тұрғындар мектеп ғимаратының ескіргенін, күрделі жөндеуге қаражат бөлуін сұраған еді. Биыл облыс әкімі қолдауымен тұрғындар сұранысы орындалып отыр.
Теректі аудандық білім бөлімінің басшысы Жанаргүл Құсайынованың айтуынша, жоба құны – 230,5 миллион теңге. Бағдарлама ауқымында құрылысты жүргізуге 198,8 миллион теңге бөлінген. Мектеп 320 оқушыны қамти алады. Ғимараттың жалпы ауданы – 2 146 м2. Қазіргі уақытта білім ошағында 126 бала оқып жатыр. Аудандағы Төңкеріс пен Қоныссай ауылдарында мектептер жабылу алдында. Сондықтан осы ауылдағы балаларды Чапаев мектебіне оқыту, ол үшін мектеп жанынан интернат салу жоспарланған.
Мамыр айының басында құрылыс материалдары мен техникалар жеткізілген. «Фирма ИСКОМ» ЖШС 57 адамды жұмысқа алады. Бағдарлама талабына сәйкес жергілікті 29 тұрғын жұмыспен қамтылады.
Облыс әкімі Ғали Есқалиев Долинное, Төңкеріс, Қоныссай ауылдарын газбен жабдықтау жұмысымен танысты. Жоба құны – 337 237,0 мың теңге. Бүгінгі таңда мердігер «Батысгазстрой» тапсырыс берушімен 298 877,3 мың теңгеге келісімшарт жасасқан. Газ өткізу жұмысына 84 адам тартылады.
Облыс әкімі Ғали Есқалиев мердігерге құрылыс жұмысының сапалы жүргізуін тапсырып, аудан басшысы Әділ Жоламановқа ауылішілік газ құбырын жеткізу құнын қадағалау керектігін ескертті.
Айта кетейік, жұмыспен қамтудың 2020 – 2021 жылдарға арналған жол картасы шеңберінде Батыс Қазақстан облысына 178 жобаны жүзеге асыруға 35,5 млрд. теңге қаражат қарастырылды. Әлеуметтік-мәдениет нысандарын күрделі және ағымдағы жөндеуге және реконструкциялау бойынша 70 жобаға 13,4 млрд. теңге бөлінген.
Нұртай Алтайұлы
zhaikpress.kz
