Іссапар аясында өңір басшысы алдымен Жарсуат ауылына барып, ауыл тұрғындары үшін маңызды нысандардың жағдайымен танысты. Мұнда мәдениет үйі ғимаратында жүргізіліп жатқан жөндеу жұмыстары мен спорт кешенінің құрылысы барысын қадағалап, мердігер компания өкілдерімен пікір алмасты. Әкім нысандардың сапалы әрі уақытылы аяқталуының маңыздылығын атап өтіп, жұмыстың қарқынын бағамдады.
Бұдан соң Нариман Төреғалиұлы Ақсай қаласындағы 300 орындық №1 жайлы мектеп пен 900 орындық №7 жайлы мектеп құрылысының барысын тексерді.
Бұл білім ордалары өңірдегі оқушыларға қолайлы білім алу ортасын қалыптастырып, заманауи стандарттарға сай сапалы білім беру ісін дамытуға сеп болмақ. Мектеп құрылыс алаңындағы жұмыс қарқынын бағамдаған облыс әкімі Нариман Төреғалиұлы істің баяу жүріп жатқанын сынға алып, мердігер компанияға жұмысты тездетіп, мерзімінде әрі сапалы аяқтаудың маңыздылығын қадап айтты.
Сапар барысында облыс әкімі Приурал ауылында болып, ауыл тұрғындарымен ашық жүздесті. Кездесуде Бөрлі ауданының әкімі Еркебұлан Ихсанов аудан көлемінде атқарылған жұмыстар мен алдағы жоспарлар туралы баяндама жасады.
Өз сөзінде Нариман Төреғалиұлы өңірдің әлеуметтік-экономикалық дамуы бойынша негізгі көрсеткіштерге тоқталды:
«2025 жылғы 1 шілдедегі жағдай бойынша облыста жұмыс істеп тұрған шағын және орта кәсіпкерлік субъектілерінің саны 58 593 бірлікті құрап, өткен жылдың сәйкесті кезеңімен салыстырғанда 1,1%-ға артты.
Шағын және орта кәсіпкерлікте жұмыспен қамтылғандар саны 120,3 мың адамға жетті. Ағымдағы жылдың 1-тоқсанында шағын және орта бизнес субъектілерінің өндірген өнім көлемі өткен жылмен салыстырғанда 2,7%-ға өсті»,– деді өңір басшысы.
Есептік жиын барысында ауыл тұрғындары өздерін толғандырған сұрақтарын қойып, өңір басшысынан, тиісті сала басшыларынан нақты жауап алды.
Кездесуден кейін азаматтар облыс әкіміне жеке қабылдауға жазылып, өз мәселелерін жеке форматта жеткізу мүмкіндігіне ие болды.
