БҚО әкімі Алтай Көлгінов Астана қаласына жұмыс сапары барысында Елорда басшысы Әсет Исекешовпен кездесті, деп хабарлайды БҚО әкімінің баспасөз қызметі.
Кездесу барысында «SmartAstana» жобасы аясында «Астана Innovations» АҚ жүзеге асырып жатқан smart-жобалар мен бастамалар таныстырылды. Бұның ішінде жобалық мекеме, smart-медицина, smart-мектеп, ақылды жарықтандыру, бейнебақылау, е-КСК, балаларды балабақшаларға бөлудің автоматтандырылған жүйесі және т.б жобалар бар.
БҚО әкімі жақын арада іске асатын нақты жобаларға қызығушылық танытты. Яғни жуық арада оралдықтар, сонымен қатар облыс тұрғындары smart-технологияның игілігін көруі мүмкін.
Өз кезегінде Астана қаласының әкімі Әсет Исекешов еліміздің бас қаласына да батыс аймақтан түрлі бағыттар бойынша алмасар тәжірибе бар екендігін жеткізді.
Кездесу қорытындысы бойынша бірлесіп жұмыс істеу және өзара тәжірибе алмасу мақсатында жуық арада меморандумға қол қою туралы шешім қабылданды.
zhaikpress.kz
