Бүгін өңіріміздің төл арнасы «AQJAYIQ» телеарнасының 60 жылдығына арналған «Ақжайықтың айнасына – 60 жыл» атты салтанатты жиын, мерекелік концерті өтті.
Мерекелік шара арнаның 60 жылдығына арналған фотожинақтың тұсаукесерінен бастау алды.
Фотожинақтың лентасын қию құрметі арнаның ардагері, ҚР Мәдениет қайраткері, Қазақстан Журналистер одағының мүшесі Баян Мұхамбеталиев пен арна ардагері, директор, редактор болып қызмет еткен Сара Набиуллинаға бұйырды.
Салтанатты жиынның шымылдығын «Құрмет» орденінің иегері, ҚР Мәдениет саласының үздігі Еркін Нұрымбетов жетекшілік ететін Дәулеткерей атындағы қазақ халық аспаптары оркестрі түрді.
Облыс әкімінің орынбасары Қайыржан Меңдіғалиев «AQJAYIQ» телеарнасының ұжымын құттықтап, арнаның ардагерлері мен қызметкерлеріне салалық төсбелгі, Мәдениет және ақпарат министрлігінің, облыс әкімінің алғысхаттарын табыстады.
Аймақ айнасын Ақжайықтың ақ шағаласы, «Отан» орденінің иегері, ҚР еңбек сіңірген қайраткері Ақұштап Бақтыгереева құттықтау хат жолдады.
Мерейтойға жиылған жұртшылыққа «Қазақстан» республикалық телерадиокорпорациясы» акционерлік қоғамы БҚОФ директоры Клара Қамбетова әріптестерін құттықтап, бірқатар сала үздіктеріне «Ардагерлер ұйымы» республикалық қоғамдық бірлесітігінің атынан «Еңбек ардагері», Қазақстан Журналистер одағының атынан «Қазақстанның құрметті журналисі» төсбелгілерін, «Қазақстан» республикалық телерадиокорпорациясы» акционерлік қоғамы Басқарма төрайымы Ләззат Танысбайдың Құрмет грамотасын, алғыс хатын және төл арнамен тұрақты байланыс орнатып, қолдауын көрсетіп жүрген демеушілерге мерекелік медальдарды табыс етті.
Жиын мерекелік кешке ұласып өнердің өз адамдары Ғ.Құрманғалиев атындағы облыстық филармонияның әншілері кеш көркін келтірсе, «Ақжайық арнасы» әнімен мерейлі кештің әдемі нүктесі қойылды.
Айжан Бауыржанқызы,
ҚР Журналистер одағының мүшесі
