2025 жылы Орал қаласында Батыс Қазақстан облысында дарынды балаларға арналған жаңа мамандандырылған №8 мектеп-лицейінің құрылысы жүргізілуде. Бұл жоба білім инфрақұрылымын қолдау қорының қаржысы есебінен жүзеге асырылып, қазіргі мектеп ғимаратының апаттық жағдайымен байланысты өзекті мәселені шешуге бағытталған.
Соңғы төрт жыл ішінде №8 мектеп-лицейі Орал қаласындағы №37 орта мектеп ғимаратында уақытша орналасып, оқу үдерісі шектеулі жағдайларда жүргізілді. Себебі білім беру мекемесінде тек 10 сынып кабинеті болған және ол толық көлемде оқушылардың білім алу қажеттіліктерін қамтамасыз ете алмайтын еді.
- Құрылыс жұмыстарының уақытында аяқталуы үшін барлық күш-жігерімізді салып отырмыз және құрылыс барысын үнемі бақылауда ұстап келеміз. Келесі қадам — бұл әрлеу жұмыстарын аяқтау және мектепті пайдалануға беру үшін дайындау.Біз оқушыларымыздың әлеуетін толық ашып, оларға жоғары деңгейде білім беру үшін барынша қолайлы жағдайлар жасауға тырысамыз, — деді құрылыс басқармасының басшысы Әлибек Антазиев.
Жаңа мектеп 400 оқушыға арналған және жалпы алаңы 8 262,5 м² болатын заманауи төрт қабатты ғимарат болып салынады. Мектепте қазіргі заманғы жабдықтар орнатылып, робототехника зертханалары ашылады, оның ішінде дрондарды басқару бойынша оқу бағдарламасы да қарастырылған. Осылайша, мектеп тек базалық білім беретін орталық қана емес, сонымен қатар техникалық және инженерлік ойлау қабілетін дамытуға арналған орталыққа айналатын болады.
Қазіргі уақытта құрылыс жұмыстарының алғашқы кезеңі аяқталды. Фундаменттік жұмыстар аяқталып, ғимараттың екінші және үшінші қабаттарының сыртқы қабырғаларын тұрғызу, ішкі бөлмелерді орнату, бірінші қабатқа терезелерді орнату және жабын плиталарын қою жұмыстары жүргізілуде. Сонымен қатар жертөле мен бірінші қабаттың ішкі әрлеу жұмыстары да басталды. Қазіргі уақытта құрылыс жұмыстарының жалпы дайындық деңгейі 22%-ды құрайды.
Барлық құрылыс жұмыстары биылғы жылдың соңына дейін аяқталып, жаңа мектеп пайдалануға берілмек. Жаңа оқу кешені Батыс Қазақстан облысының білім инфрақұрылымын дамытуға елеулі үлес қосып, дарынды балалардың білім алуына және дамуына оңтайлы жағдай жасайды.
БҚО Құрылыс басқармасының баспасөз қызметі
