Апта соңында Мемлекеттік сыйлықтың иегері, Қазақстанның Халық жазушысы Қадыр Мырза Әлидің 85 жылдығына арналған мерекелік іс-шаралар Оралда Алматыдан арнайы келген құрметті меймандардың Қадыр ақынның ескерткішіне гүл шоғын қоюмен басталды.
Шараға облыс әкімі Ғали Есқалиев қатысып, сөз сөйледі. Бұдан кейін Қазақстан Жазушылар Одағының басқарма төрағасы Ұлықбек Есдәулет пен Халықаралық айтыскерлер мен жыршы-термешілер одағының басқарма төрағасы Жүрсін Ерман Қадыр ақын туралы естеліктерімен бөлісті. Мерейтой аясында жарық көрген белгілі қаламгер Қали Сәрсенбайдың «Қазақтың Қадыры» атты кітабының таныстырылымы өтті. Бұдан кейін «Қазақтың Қадыры» атты облыстық жыр мүшәйрасының жеңімпаздары марапатталды.
Мүшәйра қорытындысы бойынша бас жүлде оралдық Айбол Исламғалидің еншісіне тисе, І орынды жаңақалалық Мәрлен Ғилымхан иеленді. Ал ІІ орынды бөрлілік Мейрамбек Сыдық қанжығаласа, ІІІ орынды Махамбет Өтемісов атындағы БҚУ-дың І курс студенті Әділ Ахметов пен сырымдық Бауыржан Ширмединұлы бөлісті. Арнайы екі сыйлық Ернар Жақсыбаев пен ақжайықтық Абылайхан Мақсұтовқа табысталды.
Кеш соңында құрметті меймандарға сый-сыяпат көрсетілді.
Ләззат Шағатай,
zhaikpress.kz
