Мемлекеттік қызмет істері агенттігінің Батыс Қазақстан облысы бойынша департаменті Орал қаласы әкімдігімен бірлесіп, Ұлттық мереке – 25 қазанда атап өтілетін Республика күні қарсаңында дәстүрлі «Ана тілім – арым» атты облыстық байқауын ұйымдастырды. Бұл туралы ҚР Мемлекеттік қызмет істері агенттігінің БҚО бойынша департаментінің баспасөз қызметі хабарлайды.
Байқаудың мақсаты мемлекеттің тіл саясатын, ұлттық салт-дәстүрді, құндылықтарды насихаттау, мемлекеттік тілдің, ұлттық дәстүрдің қолданыс аясын кеңейту, мәртебесін арттыру және мемлекеттік қызметшілердің сөйлеу мәдениетін, дәстүріміз бен ділімізді сақтау деңгейін анықтау болып табылады.
Бекітілген шарттар мен қатысу тәртібіне сәйкес, байқау «Менің визиткам», «Дәстүрден тағылым», «Поэзия сағаты», «Мықты болсаң, шауып көр» кезеңдерін қамтып, әр кезең қазылар алқасымен балдық жүйемен бағаланды.
Осылайша, байқаудың қорытындысы бойынша бас жүлдеге Орал қаласының №2 соты әкімшісінің сот приставы Сандуғаш Тұрдыбаева ие болды.
1-орынды Бөкей ордасы ауданы экономика және қаржы бөлімінің бас маманы Динара Еділбаева иеленсе, 2-орын Қаратөбе ауданының Жусандыой ауылдық округі әкімі аппаратының бас маманы Айгүл Бақытжанова, Орал қаласының жұмыспен қамту және әлеуметтік бағдарламалар бөлімінің жәрдемақыларды тағайындау секторының меңгерушісі Анжела Горбунова және Сырым ауданының ішкі саясат бөлімінің бас маманы Перизат Илашеваға берілді.
3-орынды Батыс Қазақстан облысының мәдениет, тілдерді дамыту және архив ісі басқармасының тілдерді дамыту және ономастика бөлімінің бас маманы Алтынбек Ермекқалиев Алтынбек, Тасқала аудандық мәдениет, тілдерді дамыту, дене шынықтыру және спорт бөлімінің бас маманы Аблай Қалимоллаев және Батыс Қазақстан облысы бойынша Мемлекеттік кірістер департаментінің Орал қаласы бойынша Мемлекеттік кірістер басқармасының Камералдық бақылау бөлімінің бас маманы Багдат Сиражов иеленді.
Барлық қатысушыларға Мемлекеттік қызмет істері агенттігінің Батыс Қазақстан облысы бойынша департаменті басшысының және Орал қаласы әкімінің дипломдары мен алғысхаттары және арнайы сыйлықтар табыс етілді.
