Бүгін жаңа Ақжайық шағынауданында тағы бір тұрғын үй қолданысқа берілді. Бұл туралы қала әкімдігінің баспасөз қызметі жазды.
Сурет авторы: Мәди Салық
Мемлекеттік бюджет есебінен салынған үй «Отбасы банк» АҚ арқылы төмен мөлшерлемемен кезекте тұрған отбасыларға берілді.
Жаңа қоныс иелерін Батыс Қазақстан облысының әкімі Нариман Төреғалиев құттықтады.
«Наурыз мейрамы қарсаңында қуанышқа кенеліп жатсыздар. Мемлекет басшысы халыққа әр Жолдауында отбасыларды тұрғын үймен қамту мәселесіне ерекше мән береді. Біздің облыста баспанаға мұқтаж азаматтардың сұранысын қанағаттандыру мақсатында жүйелі жұмыс жүргізіліп жатыр. Жаңа Ақжайық шағынауданы 30 мың адамға арналған. Барлығы 76 көппәтерлі тұрғын үйдің құрылысы жүргізіледі. Қазір мұнда тұрғындардың жайлы өмір сүруі үшін қажетті инфрақұрылым қалыптасып жатыр. Алдағы уақытта шағын ауданда мектеп, балабақша, облыстық аурухана, перинаталды орталық секілді маңызды әлеуметтік нысандар салынады», - деген өңір басшысы жаңа пәтер иелерінің шаңырағына құт-береке тіледі.
Жаңа көппәтерлі тұрғын үйдің қүрылысын «Альтаир СК-7» ЖШС мердігер мекемесі жүргізген. Мұнда барлығы 120 пәтер бар.
Жалпы Ақжайық шағынауданында осымен бесінші көппәтерлі тұрғын үй пайдалануға берілді.
Наурыз айының басында аталған шағын ауданға қатынайтын жаңа қоғамдық көлік бағыты желіге шыққан болатын.
@zhaikpress.kz
