Орал қаласында «Тұғыры биік Тәуелсіздік!» атты VIII «Алтын домбыра» республикалық ақындар айтысы басталды.
- Қайырлы күн, өнерсүйер қауым. Ақ Жайықта алғаш өткелі тұрған "Алтын домбыра" ақындар айтысының ашылуымен құттықтаймын. Тарихы мол, табиғаты көркем Ақ Жайыққа қош келдіңіздер. Осы айтысты ұйымдастыруға мұрындық болған "Nur Otan" партиясы мен ҚР Мәдениет және спорт министрлігіне алғыс айтамын. Еліміздің бұл додасы Тәуелсіздік күнімен сәйкес келуі тегін емес. Айтыс - бабалар аманаты. Ақындарға шалқар шабыт тілеймін, - деді облыс әкімі Ғали Есқалиев.
Одан кейін "Nur Otan" партиясының хатшысы Ғабидолла Оспанқұлов сөз алды.
- "Nur Otan" залына айтыс ардагерлері де келіп отыр. Аламанға дейін ұрпақтар сабақтастығы ретінде жас буынмен бас қосып, ұсыныстарын айтты. "Nur Otan" партиясының төрағасы Нұрсұлтан Назарбаев ЮНЕСКО-ның материалдық емес мәдени мұралар тізіміне енген айтыс өнерін қолдау білдіруді тапсырды. Тәуелсіздігіміз мәңгі болсын! Айтыстың тұғыры биік болсын, - деді Ғабидолла Оспанқұлов.
Сахнаға шыққан ҚР Мәдениет және спорт министрінің орынбасары Нұрғиса Дәуешов бас жүлде "Алтын домбыра" жеңімпаз ақынның ауылында тұратынын айтты.
Облыс әкімі Ғали Есқалиев Қазақстан Республикасының Президенті Жарлығымен тағайындалған "Парасат" орденін Жүрсін Ерман мен "Құрмет" орденін Айбек Қалиевке табыстады.
- Ақ Жайықтағы ұйымдастырушылар айтыс өнерінде тұңғыш рет тимбилдинг деген іс-шара өткізді. Өнер саңлақтарымен арқа-жарқа болып, екі күн келелі мәжіліс өткіздік. Бүгін аламан айтысқа 20 жүйрікті айтысқа шығарып отырмыз. Ақ Жайық халқы ақындарға әділ бағасын бере біледі, сөз құдіретін таниды, - деді айтыс абызы Жүрсін Ерман.
VIII «Алтын домбыра» республикалық ақындар айтысында Жансая Мусина, Жандарбек Бұлғақов, Айбек Қалиев, Серік Құсанбаев, Әсем Ережеқызы, Серік Асқаров, Аспанбек Шұғатаев, Сезімхан Шоңаев, Қанат Мырзахан, Аруна Керімбек, Өміржан Көпбосынов, Жұлдызай Маратбекова, Қазірет Бердіхан, Біржан Байтуов, Талғат Мықи, Рүстем Қайыртайұлы, Дидар Хамиев, Бауыржан Ширмединұлы, Мұхтар Ниязов, Шалқарбай Ізбасаров өнер көрсетеді.
Қазылар алқасында өнер саңлақтары, арқалы ақындар Несіпбек Айтұлы, Әсия Беркенова, Мұхамеджан Тазабеков, Бауыржан Халиолла, Аманжол Әлтаев, Дариға Мұштанова, Қойлыбай Асанов, Жанарбек Әшімжан бар. "Алтын домбыра" айтысын Жансая Мусина мен Жандарбек Бұлғақов бастады.
Нұртай Алтайұлы,
zhaikpress.kz
