Бүгін Орал қаласындағы «Атамекен» өнер ордасында Домбыра күніне арналған «Терме – рухтың азығы, домбыра – ұлттың қазығы» атты мерекелік кеш өтті.
Батыс Қазақстан облысы әкімдігінің тікелей қолдауымен, облыстық дін істері басқармасының мұрындық болуымен өткен іс-шараға облыс әкімі аппаратының басшысы Нұрділдә Ораз, Алматы шаһарынан Қазақ ұлттық университетінің профессоры Алмас Алматов, Астана қаласынан айтыскер ақын Дидар Қамиев, Ақтөбеден «Ер-Едіге» жыр мектебінің жетекшісі Әділбек Сарин және Ғ.Құрманғалиев атындағы облыстық филармонияның әншісі Айтуған Нұралы қатысты.
Мерекелер жиын барысында жиылған жамиғаттың алдында діни термелер орындалып, домбыраның күмбірі үдей түсті.
Шарада кеш қонақтарынан бөлек, «Атамекен» өнер ордасының жанынан құрылған фольклорлық ансамблі мен республикада алғашқылардың бірі болып бірыңғай термешілерден құрылған үлгілі «Қыз Жібек» ансамблі өнер көрсетті.
Бұған қоса М.Өтемісов атындағы Батыс Қазақстан мемлекеттік университетінің профессоры, педагогика ғылымдарының докторы Абат Қыдыршаев «Азаттықты аңсаған Ғұмар Қараш» атты Ғұмар Қараштың өлеңдерін мәнерлеп оқудан өткен облыстық байқаудың жеңімпаз-жүлдегерлерін салтанатты түрде марапаттады.
Аружан Аманжол
«Орал өңірі»
Сурет авторы: Мәди Салық
