Орал қаласының әкімі Абат Шыныбеков тұрғындарға қалалық мәдениет және демалыс саябағын дамыту жайын баяндады. Жоба бойынша дендрологиялық төлқұжат жасақтау, ойын алаңы мен субұрқақты жөндеу жұмысы қарастырылған. Саябаққа биыл жеке инвестиция есебінен «Алтын Шаған» атты шолу шеңбері орнатылмақ. Былтыр қалада Шаған өзенінің жағалауында «Арқанды саябақ» ашылды.
– «Арқанды саябақта» спорттық туризмге арналған жеті кезеңді кедергі орнатылып, қала тұрғындарының серуендейтін, туристік және спорттық жарыстар өткізетін демалыс орнына айналады деп сенемін. Биыл қалада жасөспірімдерге арналған ат спорты бөлімін ашамыз. Ұлттық спорттың төрт түрі бойынша оқу-жаттығу жұмысы жүргізіледі. Жас спортшылар аударыспақ, көкпар, жамбы ату, теңге ілудің қыр-сырын меңгереді. Жаңа үйірмеге 9-16 жас аралығындағы 300 жасөспірім қабылданады, – деді Орал қаласының әкімі Абат Шыныбеков.
Нұртай Текебай,
zhaikpress.kz
