Өңірде Наурыз мейрамына арналған шаралар басталды. Қалалық білім ұйымдарында ұлттық құндылықтарды дәріптей отырып, жас ұрпаққа рухани ұлттық бағытта тәрбие беру, ұлтымыздың салт-дәстүрін оқушы бойына сіңіру, тәлім-тәрбие беру мақсатындағы шаралар ұйымдастырылуда. Оған мектеп ұжымдарымен қатар ата-аналар да жұмылдырылып отыр.
Орал қаласы білім бөлімі баспасөз қызметінің хабарлауынша, қаланың 50 орта мектебі мен 50 мектепке дейінгі ұйымы бүгін дәстүрлі «Бауырсақ» фестивалін өткізді.
Мектеп оқушылары ұлттық нақышта киініп, өздерінің дайындап алып келген ұлттық тағамдарын көпшілікке ұсынды.
Фестивальге ақ жаулықты әжелер, ару аналар қатысты. Ұлттық салт-дәстүрлердің орындалу барысынан қойылымдар көрсетіліп, халықтық ән мен күй орындалды. Қыздар әсем бимен фестиваль көрігін келтірді. Ұлттық ойындарды ұлықтау мақсатында асық ату, тоғызқұмалақ сынды ойындар өткізіліп, оқушылар ой ұшқырлықтары мен ептіліктерін сынға салды.
Апта бойы мектептерде ұлыстың ұлы күніне орайластырылған «Отбасым – байлығым» ұлттық дәстүрден отбасылық сайыс, «Ертегілер әлеміне саяхат» ұлттық ертегілер қойылымдары, «Қош келдің, әз Наурыз» мерекелік шарасы, тәрбие сағаттары өткізіледі.
Ал 15 наурызда «Әсемдік отбасыма жарасады» отбасылық гүл отырғызу челленджі ұйымдастырылмақ.
zhaikpress.kz
