«Президент шыршасы» аясында Мемлекет басшысы Қасым-Жомарт Кемелұлы Тоқаевтың жаңажылдық сыйлығын оралдық 24 бала алды. Олардың арасында жетім балалар, ата-анасының қамқорлығынсыз қалған балалар, аз қамтылған және көпбалалы отбасылардан шыққан балалар, сондай-ақ оқуда, спортта, шығармашылықта немесе қоғамдық өмірде жетістікке жеткен дарынды жеткіншектер бар.
Бүгін Орал қаласы әкімі Абат Шыныбеков пен қалалық білім беру бөлімінің басшысы Ақжарқын Темірханова дарынды ұлан Азат Нұрбекті арнайы құттықтап, үйіне барды. Мерекенің басты кейіпкерлері Аяз Ата мен Ақша қар, өткен жылдың иесі Сиыр мен жаңа жыл иесі Барыс та келді.
Абат Абайұлы Азат пен бауырларын Жаңа жылмен құттықтап, Мемлекет басшысының ашық хаты мен сыйлығын тарту етті.
Сыйлық жиынтығында bilimbook, роутер, энциклопедиялық кітаптар мен тәттілер бар.
Азат Нұрбек №50 ЖОББ мектептің 4-сынып оқушысы. Оқу екпіндісі, түрлі байқау-жарыстардың жүлдегері. Ел Тәуелсіздігінің 30 жылдығына орай мәнерлеп оқу байқауының «Ұлтжанды ұл» аталымының иегері.
Азат Президенттің құттықтауын жеткізген шаһар басшысына рахметін айтып, өзінің де елжанды, ұлт үшін қызмет ететін азамат болуға ұмтылатынын жеткізді. Сондай-ақ А.Садықтың «Тәуелсіздік» өлеңін оқып берді.
Сонымен қатар бауырлары Таңшолпан, Маржан, Рахимге де мерекелік сый қоржыны ұсынылды.
Балалардың әкесі – Азамат Нұрбек ТЖД саласының қызметкері. Анасы Гүлім Нұрбекова қала басшысына, білім бөліміне алғысын білдірді.
Эльмира Нұғманова,
Орал қалалық білім беру бөлімінің баспасөз қызметі
