Бүгін ҚР Ұлттық ұланының «Батыс» өңірлік қолбасшылығына қарасты 5517 әскери бөлімінде 7 мамыр – Отан қорғаушылар күні және Ұлы Жеңістің 80 жылдығына арналған салтанатты іс-шара өтті.
Бұл туралы ҚР Ұлттық ұланы “Батыс” өңірлік қолбасшылығының баспасөз қызметі хабарлады.
Мерекелік жиынға Ұлы Отан соғысының ардагері Кочережкин Константин Леонтьевич, Ұлттық ұланның ардагерлері, қала мектептерінің оқушылары мен колледж студенттері қатысты.
Шара барысында әскери қызметте ерекше көзге түскен сарбаздар мен офицерлер кеуде белгілерімен және алғыс хаттармен марапатталды.
Сондай-ақ әскери техника мен қару-жарақ түрлері, әскери киім үлгілері қойылған көрме ұйымдастырылып, келген қонақтар назарына ұсынылды.
Салтанатты шара әскери оркестр мен бөлімнің өнерпаздары дайындаған концерттік бағдарламамен жалғасты.
Мерекелік шара барысында ҚР Ұлттық ұланы “Батыс” өңірлік қолбасшылығының қолбасшысы, генерал-майор Бекайдар Қазкеев және өңірлік қолбасшылықтың ардагерлер кеңесінің төрағасы, запастағы подполковник Бақытжан Бердиев қатысушыларды құттықтап, сөз сөйледі.
Олар еліміздің тыныштығы мен қауіпсіздігін қамтамасыз етуде әскери қызметтің маңыздылығына тоқталып, жас ұрпақты Отанға адал қызмет етуге шақырды.
Шара соңында ардагерлер мен қонақтарға дәстүрлі сарбаз ботқасы ұсынылды.
zhaikpress.kz
