Орал «Сервис» технологиялық колледжі кітапханасында «Оқуға құштар колледж» жобасы аясында Отбасы күніне арналған «Мейірімділік ошағы – отбасы» атты бенефис ұйымдастырылды. Шараға «Отбасы» орталығының психолог маманы Индира Шүкірбаева, «Отбасы хрестоматиясы» кітаптарын насихаттаушы Сәуле Якиев және өзге де қонақтар қатысты.
Бенефисте отбасы құндылықтары, бала тәрбиесі, отбасындағы жайлы қарым-қатынас туралы өзекті ойлар ортаға салынды. Спикерлер баланың кішкентай кезінен отбасы құндылықтарын сезініп, бағалап өсуі маңызды екенін ерекше атап өтті. Сәби шағынан ата-ананың өз жауапкершілігі бар екенін түсініп өскен бала өскен соң, ата-анасынан көргенін жасайды. Сондықтан балаға сөзбен емес, іспен үлгі бола білу бәрінен де маңызды болып қала бермек.
Шарада студенттер спикерлерге сұрақтарын жолдап, жауап алды. Ән-бимен өрілген әдемі кеште отбасына құрметпен қарай білу, қоғамға пайдасы тиетін ұл мен қыз тәрбиелеу жөнінде өткір пікірлер айтылды. «Отбасы – ұрпақ тірегі» атты кітап көрмесіне жасалған библио-графиялық шолу да студенттерге ой салды. Кеш соңында Сәуле Алдашқызы колледж кітапханасына «Отбасы хрестоматиясы» кітаптарын сыйлыққа тарту етті.
Айнұр Ильясова,
Орал «Сервис» технологиялық колледжі кітапханасының меңгерушісі
