Өлермендік белгісі – өндіріп жазу, шеберліктің белгісі – сендіріп жазу.
* * *
Қызметің өскенде құттықтау көбейеді, қызметтен түскенде қыт-қыттау көбейеді.
* * *
Қаламгердің үстелі – стилі: жинақы көрінсе, ойының да жинақы болғаны.
* * *
Әріптердің бәрі бас әріпке бағынады.
* * *
Қол беру кішіліктің үлгісі, жол беру кісіліктің үлгісі.
* * *
Алақаның ақшаға емес, батаға жайылсын.
* * *
Баланы шеше адастырмайды, көше адастырады.
* * *
Сараңдық сүйекке бітеді, мырзалық ниетке бітеді.
* * *
Құрғақ сөз бен қызыл сөз: бірі – тұман, бірі – күмән.
* * *
Сайраған жолға түспе, таңдаған жолға түс.
* * *
Жемқорлықтың жолы болмайды, торы болады.
* * *
Өрге шықсаң, өңірді көресің, елге шықсаң, өмірді көресің.
* * *
Озам деп асықпа, қалмайын деп асық.
Жемқорлықты жоямыз дейтіндер көп, қоямыз дейтіндер жоқ.
* * *
Үгітке сенбе, үмітке сен.
* * *
Қорғамаса ел азар,
Қолдамаса ер азар.
* * *
Қазақ мектебі көбеймей, қазақ тілінің көсегеі көгермейді.
* * *
Қара жұмыс шаршатпайды,
Шала жұмыс шаршатады.
* * *
Депутаттар заңға жауап бермейді, заңға дауыс береді.
* * *
Бір ой ұстатпайды,
Бір ой ұйықтатпайды.
Жақау Дәуренбеков,
жазушы-публицист, «Алаш» халықаралық әдеби сыйлығының лауреаты
