Әйелдің еркекті қызықтыратын тоғыз түрлі қасиеті бар. Олар: әдемі қол, әсем аяқ, жәудір көз, оймақ ауыз, маржан тіс, жайдары мінез, сыбызғы дауыс, сымбатты тұлға, жарқын жүз.
* * *
Әйел көзі күлімдеп қадалғанға дейін еркек ақылды һәм сабырлы, қадалғаннан кейін бұл қасиеттердің бәрінен айырылады.
* * *
Алдымен ақшаңды ұқыпты ұста, ақшадан гөрі әйеліңді күтіп ұста, ал әйелден де, ақшадан да гөрі анаңды ардақтап ұста.
* * *
Сұлулық пен сымбат, күлкі мен қуаныш – жастықтың серігі, сиықсыздық пен сырқат, айғай мен шу – кәріліктің серігі.
* * *
Анаға жол беру, атаға қол беру – әр жастың абыройлы борышы.
* * *
Ұрсып айтқан ақыл – ұрып үйреткен сабақ секілді: көңілге қонбайды, ойға дарымайды.
* * *
Құмарлықты көз айтып, тілекті тіл жеткізеді.
* * *
Махаббат бар жерде көз жасы қоса жүреді.
* * *
Әйелге жүз туыстан жақсы жары артық.
* * *
Адамды жас қартайтпайды, бақытсыздық қартайтады.
* * *
Шын сүю – өзіңді мүлде ұмыту деген сөз.
* * *
Әйел жүрегінің жылуы күліп тұрған күн қызуынан кем емес.
* * *
Махаббат – кәріні жас, алысты жақын ететін ұлы күш.
* * *
Көп қиналтып қолыңа түскен әйел ғана сүйкімді.
* * *
Әйел арсыз болса, сан жерден сақшы қойсаң да пайда жоқ.
* * *
Дүниедегі ең тұрақты махаббат – солдат махаббаты.
* * *
Қыздай жігітке қыңыр қатын кезігеді.
* * *
Тісі алтынның іші алтын бола бермейді.
* * *
Бұйра шаштың бәрі Пушкин емес.
* * *
Еңбекқор әйел еріне де, еліне де сыйлы.
* * *
Батыр қызға да бай керек.
* * *
Ана емшегін ер емеді, жер емшегін ел емеді.
* * *
Киім де кісі таңдап жарасады.
* * *
Бала – бақыт, келін – құт, кемпір – қазына.
* * *
Адал жар, асыл дос – алтыннан қымбат.
* * *
Еріншек келін еңбекшіл ененің арқасында елгезек боп көрінеді.
* * *
Ақкөңіл әйелге күйеуінен күшті құдай жоқ.
Әзілхан Нұршайықов,
Қазақстанның халық жазушысы
