Таяуда Батыс Қазақстан облысының Жастар саясаты басқармасының қолдауымен М.Өтемісов атындағы Батыс Қазақстан университеті жанындағы «Ақиқат» пікірталас орталығы» жастар қоғамдық бірлестігінің ұйымдастыруымен ел Тәуелсіздігінің 30 жылдығына арналған 14 пен 29 жас аралығындағы жастар үшін республикалық пікірсайыс турнирі өткізілді.
Аталмыш турнирге 32 фракция, 64 спикер қатысты. Оның ішінде 20 спикер өңіріміздің мектептерінен қатысқан оқушылар еді. Атап айтар болсақ, Орал «Білім-Инновация» лицей-интернатынан, Бөрлі аудандық №7 ЖОББМ-нан, №44 мектеп-гимназиясынан, №41 мектеп-лицейінен, №33 ЖОББМ-нан, «125 HIGHSCHOOL» мектебінен пікірсайысшы-оқушылар қатысты.
Турнир нәтижесінде Орал қалалық мектептен тыс жұмыс орталығы жанындағы «Семсер» интеллектуалды пікірсайыс клубының мүшелері, №33 ЖОББМ-ның 9-сынып оқушысы Айнара Темирханова мен Ж.Досмұхамедов атындағы Жоғарғы педагогикалық колледжінің 1-курс студенті Инабат Игизғали іріктеу ойындарында үздік нәтиже көрсетіп, жастар финалында жүлделі 1-орынды иеленді.
