ҚР Кәсіподақтар федерациясы алдағы Парламент Мәжілісі мен мәслихаттар депутаттарының сайлауына бақылаушы ретінде 5700-ге жуық адамды белгіледі. Олар сайлаудың ашықтығы мен әділ өтуін бақылайтын болады, деп хабарлайды ҚазАқпарат.
«Кеше ғана ҚР Парламенті Мәжілісі мен мәслихаттар депутаттарын сайлаудағы Қазақстан Республикасы кәсіподақтар федерациясы бақылаушыларының республикалық штабының бірінші отырысын өткіздік. Біз сайлауға бақылаушы ретінде қатысамыз. Бүгінгі күні 9500-ден астам сайлау учаскелеріне 5700-ге жуық бақылаушы өз кандидатурасын ұсынды. Біз оларға пандемия кезінде сақтық шараларын түсіндіреміз. Бақылаушылар оқудан және тренингтерден өтеді», - дейді Кәсіподақтар федерациясы төрағасының орынбасары Нұрлан Өтешев Кәсіподақтар үйінде өткен брифингте.
Республикалық штабтың мүшесі, «Мемлекеттік, банк мекемелері және халыққа қызмет көрсету қызметкерлерінің қазақстандық кәсіподағы» қоғамдық бірлестігі төрағасының орынбасары Атақозы Нұрлановтың айтуынша, басты мақсат – бақылаушылардың жұмысын ашық және адал ұйымдастыру.
«Кәсіподақтар федерациясы ҚР Парламенті Мәжілісі мен мәслихаттар депутаттарын сайлаудағы еркін процестерге бақылаушы ретінде қатысуға дайын екенін мәлімдеді. Өңірлерде аймақтық бақылаушылар штабы құрылды, оларға аймақтардан барлық ақпарат келіп түседі. Біздің мақсатымыз – бақылаушылардың жұмысын ашық, шынайы түрде ұйымдастыру және сайлаудың ашықтығы мен әділ өтуін қамтамасыз ету. Ең бастысы – адамның таңдау мүмкіндігіне қатысты конституциялық құқығын қамтамасыз ету. Менің ойымша, біз адалдықты, ашықтықты, заңнама қағидаттарын сақтауды қамтамасыз ете аламыз», - дейді Атақозы Нұрланов.
zhaikpress.kz
