Бүгін Орал қаласының әкімі Мұрат Байменов «Жайық таза қала» ЖШС-ға барып, кәсіпорын ұжымын Алғыс айту күнімен құттықтады.
– Биыл Алғыс айту күні Ораза айымен тұспа-тұс келді. Ораза ұстаған жандардың дұға-тілектері қабыл болсын. Сіздерге ел игілігі жолындағы тынымсыз еңбектеріңіз үшін алғысымды білдіремін. Қаланың тазалығын сақтауда, шаһар көшелерін күтіп-ұстауда уақытпен санаспай жұмыс істеп жүрсіздер. Серіктестіктің құрылтайшысы Тұрарбек Тілемісов кәсіпорынға жаңа техникалар алып, жұмысты жандандыруға көңіл бөліп келеді. Шаһардың шырайын кіргізіп отырған әрқайсыңызға мол табыс тілеймін. Аспанымыз ашық, еліміз тыныш болсын! - деді Мұрат Болатұлы.
Бұдан соң қала әкімі кәсіпорынның бірнеше қызметкерін алғысхатпен марапаттады.
Олардың қатарында Қуандық Шаухаров, Дулат Тоққалиев, Серікбай Төлебаев, Досқали Кенжеғали және басқалар бар.
«Жайық таза қала» ЖШС директоры Ринат Нұрғалиевтің айтуынша, қазір кәсіпорында 750адам жұмыс істейді және 230 техника бар. Ауа райы қолайсыз күндері коммуналдық мекемеқызметкерлері екі ауысымда жұмыс істейді.
Күн сайын күндізгі ауысымда 380-нен астам жұмысшы мен 250 техника, ал кеште 180-ге жуық маман мен 180 техника көше тазалауға шығады.
Айна Имашева
«Орал өңірі»
