Тәжік-Ауған учаскесінде жауынгерлік іс-қимылдарға қатысқан азаматтарға мұрағаттық анықтама Шекара қызметінің мұрағатынан беріледі, деп хабарлайды ҚР ҰҚК сайты.
2020 жылғы 6 мамырдағы Қазақстан Республикасының №322-VI «Ардагерлер туралы» заңына сәйкес, Тәжік-Ауған учаскесінде ТМД-ның шекарасын күшейтуіне қатысқан Қазақстан Республикасының әскери қызметшілері басқа елдер аумағында жауынгерлік іс-қимылдарға қатысқан ардагерлер санатына қосылған.
«Шекара қызметінің бұрынғы әскери қызметшілері жауынгерлік іс-қимылдарға қатысқанын растау анықтамаларын алу қажеттілігін ескере отырып, ҚР ҰҚК Шекара қызметінің мұрағатына өздігінен өтініш білдіріп, Алматы қаласында Наурызбай батыр көшесіндегі 77-үйге хабарласуына болады», делінген хабарламада.
Еске сала кетсек, таяуда Мемлекет басшысы «Ардагерлер туралы» Заңға қол қойған болатын. Заң жобасының негізгі мақсаты – ардагерлерді әлеуметтік қорғауға байланысты қоғамдық қатынастарды реттейтін заңнамалық актілерді жүйелеу, қайта қарау және ардагерлердің жаңа санаттарын қалыптастыру. Негізгі жаңа өзгерістер әлеуметтік төлемдерге қатысты болып отыр.
zhaikpress.kz
