Үкімет Ұлттық банкпен бірлесіп дағдарысқа қарсы іс-қимыл жоспарын әзірледі, - деп хабарлайды Tengrinews.kz тілшісі. Бұл туралы ресми мәлімдеме премьер-министр сайтында жарияланды. Онда Украинадағы оқиғаларға байланысты Қазақстан Республикасына қатысты ықтимал теріс әлеуметтік-экономикалық салдарға қарсы шұғыл әрекет ету мақсатында Үкімет пен Ұлттық банк Бірлескен іс-қимыл жоспарын дереу жүзеге асыруға кірісті делінген.
Үкімет Дағдарысқа қарсы шаралар кешенін жүзеге асырып жатыр. Ұлттық банк қаржылық тұрақтылықты қолдау үшін шаралар қабылдайды. Іс-қимыл жоспарына инфляцияны бақылауға және валюта нарығындағы тұрақтылықты сақтау, жұмыспен қамтуды қолдауға және жаңа жұмыс орындарын құру, кәсіпкерлікті дамыту шараларын қамтиды.
Қаржы нарығының тұрақтылығын және теңгедегі депозиттердің тартымдылығын қамтамасыз ету мақсатында Үкімет Ұлттық Банкпен бірлесіп, бюджет есебінен халықтың депозиттері бойынша сыйақы есептеуді көздейтін Теңгедегі салымдарды қорғау бағдарламасын іске асырады.
Экономикалық саясаттың әлеуметтік бағыттылығын ескере отырып, халықтың әл-ауқатын арттыру міндеттерін іске асыруда ең алдымен ауылдық елді мекендерге, моно- және шағын қалаларға, елорда мен республикалық маңызы бар қалалар төңірегіне баса назар аударылады, делінген хабарлмада.
Ауыл шаруашылығына арналған жерлерді айналымға қосымша тарту арқылы ауыл шаруашылығы кооперациялары мен отбасылық шаруашылықтарды дамыту үшін жағдай жасалады.
Жалпы, ауылдарды, моно- және шағын қалаларды, елорда мен республикалық маңызы бар қалалардың шеткері аймақтарын дамытуға биыл "Ауыл – Ел бесігі" жобасы, Өңірлерді дамытудың кешенді жоспары және басқа да бағдарламалар аясында республикалық бюджеттен 200 миллиард теңгеге дейінгі қаражат бағытталған.
Өнеркәсіпті мемлекеттік қолдаудың негізгі бөлігі өнімділігі жоғары кәсіпорындарды технологиялық жаңғыртуға және дамытуға арналады. Ел экономикасын индустрияландыру және инвестициялық жобаларды іске асыру арқылы импорттық тауарларды алмастырудың маңызы зор.
"Бұл ретте мемлекеттік қолдауға ие болған кәсіпорындарға өз жұмыскерлерінің еңбекақысын, оның ішінде еңбек өнімділігін ұлғайту арқылы көбейту бойынша қарсы міндеттемелер жүктеледі. Осы мақсатта биыл "Бизнестің жол картасы – 2025" бағдарламасын, атап айтқанда, кредиттерді субсидиялауды және кепілдендіруді қаржыландыру едәуір ұлғайтылады", - делінген хабарламада.
Бұдан басқа, агроөнеркәсіп кешенін мемлекеттік қолдау тиімділігін арттыру үшін саланы субсидиялау жүйесінің жаңа тәсілдері әзірленіп жатыр. Ауыл шаруашылығы өнімдерінің өнімділігін ұлғайтуға және қайта тереңдете өңдеуге бағытталған жобалар басымдықпен қолдауға ие болады.
Бизнеске түсетін артық әкімшілік жүктемені жою көзделген. Жыл аяғына дейін басым салаларда мемлекеттік органдардың 420-дан астам реттеу актісі қайта қаралады. Кәсіпкерлерге қойылатын талаптарға тексеру жүргізу басқа салалар бойынша да жалғасады.
"Бағаның өсуіне жол бермеу мақсатында Үкімет Ұлттық Банкпен және "Атамекен" ҰКП-мен бірлесіп, Инфляцияны бақылау және төмендету бойынша шаралар кешенін іске асырады. Халықтың әлеуметтік-экономикалық әл-ауқатын сақтау және арттыру – Үкіметтің бірінші кезектегі міндеті. Барлық күш-жігер осы міндетті іске асыруға жұмсалады", - делінген хабарлмада.
