Оралда Ұлттық ұлан жауынгерлері іздеуде жүрген жергілікті тұрғынды ұстады.
Күдіктіні іздеу туралы ақпарат БҚО ПД жедел басқару орталығы кезекшісінің пультінен келіп түсті. Жедел-іздестіру іс-шаралары барысында құрамында патруль бастығы, сержант Армат Наурызғалиев, қатардағы жауынгерлер Нұргелді Қайнар мен Бекболат Хайдаров бар 5517 әскери бөлімінің әскери жасағы патрульдеу бағытына шықты. Олар Абай даңғылындағы «Sport-Line» дүкенінің маңында іздеуде жүргендердің біріне ұқсас еуропалық келбетті ер адамды байқады.
Тәртіп сақшыларын көрген ер адам жасырынуға тырысқанмен, әскери жасақтың батыл және оңтайлы әрекеттерінің арқасында қолға түсті. Күдіктінің жеке басын тексеру кезінде оның қылмыс жасағаны үшін іздеуде екені анықталды. Әскерилер құқықбұзушыны полиция бөліміне тапсырды.
Қызметті өткеру кезіндегі көрсеткен қырағылықтары мен жоғары кәсіби шеберліктері үшін әскери жасақ 5517 әскери бөлімі командирінің атынан марапатталды.
Ерболат Сұлтанов,
«Батыс» өңірлік қолбасшылығының
баспасөз қызметінің бастығы,
подполковник
