Күрестен спорт маусымы аяқталуға жақын. Әлемдік рейтингтегі орындарға әсер етуі мүмкін ірі турнирлер күнтізбеде жоқ. Дегенмен, Қазақстаннан бірқатар балуан әлемдегі үздіктер тізіміне енді. Толығырақ Olympic.kz материалында.
Жылдың басты жарысы 2024 жылы Парижде өткен Олимпиада ойындары болды. Қазақстандық балуандар Олимпиадада бір ғана медаль жеңіп алды. Қазақстандық балуан Демеу Жадраев 77 келі салмақ дәрежесінде сәтті өнер көрсетіп, екінші орынға ие болды.
Суреттер: Olympic.kz
Сонымен қатар, ұлттық құрама жарыс жылының соңғы бөлігін жоғары деңгейде аяқтады. Балуандарымыз олимпиадалық емес салмақ дәрежелеріндегі әлем чемпионатында керемет өнер көрсетті.
Нұрқожа Қайпанов 70 келі салмақ дәрежесіне қайта оралып, жапондық Ёсиносуке Аоягиді жеңіп, алтын медальді жеңіп алды. Айта кетейік, 2019 жылы Астанада өткен әлем чемпионатында Қайпанов күміс жүлдеге ие болған еді.
Албанияның Тирана қаласында өткен осы әлем чемпионатында Ержет Жарылқасын да ерекше көзге түсті. Грек-рим күресінің шебері 63 келі салмақта финалға дейін жетіп, әзірбайжандық Нихат Мамедалиге есе жіберіп, күміс медаль алды.
Әйелдер арасындағы жарыста Жәмила Бақбергенова Қазақстанға күміс медаль сыйлады. Ол 72 келі салмақта финалда жапондық Ами Исиге жол берді.
Айта кетерлігі, Бақбергенова мансабында үшінші рет әлем чемпионатында күміс жүлдегер атанып отыр. Сондай-ақ, оның қоржынында әлем чемпионатының қола медалі бар, бұл оның Қазақстан әйелдер құрамасының көшбасшысы ретіндегі мәртебесін айқындайды.
Сонымен қатар, маусым барысында қазақстандық балуандар рейтингтік турнирлерде, Азия чемпионаттарында және Олимпиадаға іріктеу жарыстарында жоғары нәтижелер көрсетті. Бұл олардың әлемдік рейтингтегі орындарына оң әсерін тигізді. Бірнеше спортшымыз үздіктер қатарына енді.
Әлемдік рейтингтің бірінші орнын грек-рим күресінің шебері Ержет Жарылқасын (63 келіге дейін) иеленді. Демеу Жадраев (77 келіге дейін) төртінші орынға тұрақтады. Жәмила Бақбергенова 72 келіге дейінгі салмақта әлемдік рейтингтің екінші сатысын сақтап тұр. Сондай-ақ Нұрқожа Қайпанов маусымды 70 келіге дейінгі салмақта үздік үштіктің қатарында аяқтап, екінші орынды иеленді.
Еркін күрестен Әлішер Ерғали (97 келіге дейін) қазіргі уақытта әлемдік рейтингте жетінші орында тұр. Сол секілді Қазақстан еркін күрес құрамасының тағы бір спортшысы, 79 келіге дейінгі салмақта сынға түсетін Дәулет Ергеш сегізінші орынға жайғасты.
Грек-рим күресінің шеберлері Исхар Құрбаев (55 келіге дейін) пен Нұрсұлтан Тұрсынов (87 келіге дейін) та рейтингте жетінші орынға ие.
Сондай-ақ, Қазақстанның жастар құрамасының жоғары нәтижелерін ерекше атап өткен жөн. Олар да әлемдік жарыстарда жүлделерге қол жеткізуде. Мысалы, Ризабек Айтмұхан жасөспірімдер мен жастар арасындағы екі бірдей әлем чемпионатында жеңіске жетті.
Келесі маусым қаңтар айында басталады. Жарыс күнтізбесі турнирлерге толы болмақ. Қазақстандық балуандар өз орнын жақсартып, бұдан да үлкен жеңістерге жетеді деген үміт бар.
