Күрделі жөндеуден өткен Орал қалалық №6 кітапхана филиалы Қала күні мерекесі аясында оқырмандарға есігін айқара ашты.
Кітапхананың ашылу салтанатына қала әкімі Абат Шыныбеков, кино және театр актері, режиссер, Қазақстанның халық әртісі Асанәлі Әшімов, ҚР Жазушылар одағының төрағасы Ұлықбек Есдәулет, жазушы-журналист Мереке Құлкенов, сондай-ақ Жұбан Молдағалиевтың жары Софья Молдағалиева мен Қадыр Мырза Әлидің жары Салтанат Мырзалиева және өңірдегі мәдениет саласы өкілдері қатысты.
– Кітап – сарқылмайтын асыл қазына, мәдениеттің мәйегі. Бүгінгі таңда Орал қаласындағы орталықтандырылған кітапханалар жүйесінде 19 мемлекеттік кітапхана жұмыс істейді. Олардың қатарында М.Горький атындағы қалалық кітапхана, Пушкин атындағы балалар кітапханасы, 15 кітапхана филиалы, екі балалар кітапханасы бар. Бұл М.Горький атындағы №6 кітапхана филиалы 1966 жылы ашылған. 1980 жылы жаңа ғимаратқа көшірілген. Алайда одан бері де қырық жыл уақыт өтті. Бүгін, міне, қала тұрғындары үшін қуанышты күн. Қалың оқырманның игілігіне жаңарып, заманауи жабдықталған кітапхана ұсынылып отыр. Мұнда 45 мыңнан астам кітап қоры бар, – деді салтанатты шарада сөз алған Абат Абайұлы.
Жаңарған кітапхананың лентасын Софья Молдағалиева мен Салтанат Мырзалиева кесті. Өз кезегінде ҚР Жазушылар одағы төрағасының орынбасары, жазушы-журналист Мереке Құлкенов сөз алып, заманауи жабдықталған кітапхананың оқырмандары көп болуын тіледі.
Айта кетейік, рухани орталыққа күрделі жөндеу жүргізу үшін қазынадан 46 млн. теңге бөлінді. Бұл кітапхананың ерекшелігі – web-rabis бағдарламасы бойынша қызмет көрсетпек. Яғни оқырмандарға бұрынғыдай формуляр жүргізілмейді. Кітапханадағы кітаптар штрих-код арқылы аталмыш базаға енгізілген. Оқырмандардың деректері де электрондық базаға енгізіліп, оқырман билеті берілмек. Сол билеттегі штрих-кодты сканерлеу арқылы олардың деректері жүйеге сақталады. Бұл кітапхана қорындағы кітаптың қай уақытта кімнің алғанын көруге мүмкіндік бермек.
Гүлсезім Ерболатқызы,
zhaikpress.kz
