Батыс Қазақстан облысында Жайық өзеніндегі су деңгейі көтерілгені байқалады, - деп жазады KAZINFORM.
Сурет: сайт архивінен
«Қазгидромет» РМК БҚО филиалының 31 наурыздағы мәліметі бойынша бір тәулік ішінде облыстың бас өзені Бөрлі ауданы Жарсуат ауылы тұсында 9 см жоғарылап, 629 сантиметрге (қауіпті шегі — 1 мың см) жетті.
Сондай-ақ Бәйтерек ауданы Январцев гидробекетінде 499 см (+7 см, қауіптісі — 1 мың см), Орал қаласында 404 см (+11 см, 850 см), Көшімде 392 см (+11 см), Ақжайық ауданы Тайпақ ауылында 328 сантиметрді (+5 см, 1 мың см) көрсетті.
Бәйтерек ауданында Рубежка өзені 475 сантиметр (+7 см, қауіпті шегі — 1 мың см) болды.
Облыстың қалған өзендерінде су деңгейі түсіп жатыр.
Мамандардың болжауынша, Жайық өзеніндегі су деңгейі өткен жылы Орал қаласы тұсында 864 сантиметрге жетсе, биыл 550-650 см төңірегінде болмақ.
Орынбор облысындағы Иреклі су қоймасынан 21 наурызға дейін Жайық өзеніне секундына 201 текше метр су жіберілген еді. Алайда 21 наурыздан бастап ол 30, қазір 15 текше метрге дейін төмендетілді. Бұл — Жайық арнасымен келетін су азаяды деген сөз.
