Қазақ күресін кеңінен насихаттап, үздік палуандарды анықтауға арналған «Жас барыс» республикалық турнирінің облыстық кезеңі Бәйтерек ауданында өтті.
Облыс орталығы мен барлық 12 аудан спортшылары бақ сынаған бәсекеге 400-ге жуық спортшы қатысты. 2008-2009, 2006-2007 және 2003-2005 жылдары туған палуандар 30 салмақ дәрежесі бойынша, кім мықтыны анықтады.
Жарыстың ашылу салтанатына Бәйтерек ауданы әкімнің орынбасары Ерлан Ғалиев, БҚО қазақ күресі Ассоциациясының президенті Әсет Сұлтанұлы және Бәйтерек ауданының қазақ күресі федерациясы қоғамдық бірлестігінің төрағасы, аудандық мәслихат төрағасы Нұрлыбек Хайруллин қатысты.
- Талай палуан тәрбиелеген қазақ елі қазір де күресшіден кенде емес. Кешегі қажымұқан бабамыз бен Жақсылық ағамыз, арамызда жүрген Елдос бауырымыз қазақ күрес мектебінің жарқын жұлдыздары. Солардың ізін басар палуандар ауданға жиналып, кім мықтыны анықтауда. Бағы мен бабы қатар шапқан шын мықты жеңіске жетсін, - деді Бәйтерек ауданы әкімінің орынбасары Ерлан Ғалиев.
Одан соң БҚО қазақ күресі Ассоциациясының президенті Әсет Сұлтанұлы мен Бәйтерек ауданының қазақ күресі федерациясы қоғамдық бірлестігінің төрағасы, аудандық мәслихат төрағасы Нұрлыбек Хайруллин де жас спортшыларға сәттілік тіледі.
Екі күнге созылған боз кілем бәсекесі күрес көрмекке келген ағайынның делебесін қоздырды. Қазақ күресінің түрлі айла-тәсілдерін көрсетіп, әдемі белдескен палуандар спорт кешенін толтырған жанкүйердің қошеметіне ие болып жатты.
Енді облыстық турнир жеңімпаздары «Жас барыс» турнирінің елішілік сынында өңір намысын қорғайтын болады. Әзірге турнирдің қай уақытта, қай қалада өтетіні анықталмады.
Түгелбай Бисен,
zhaikpress.kz
