Елімізде жатыр мойны обыры әйелдерде онкологиялық аурулар бойынша екінші орында. Дегенмен, дәрігерлер дерттің алдын алуға болатынын айтады. Бұл туралы ҚазАқпарат жазды.
Сурет сайт архивінен
Алматы Онкологиялық орталығының онкогинекологиялық бөлім меңгерушісі Райхан Болатбекованың айтуынша, жатыр мойны обыры елдегі әйелдерде жиі кездесетін қатерлі ісіктердің бірі.
«Жатыр мойны обыры әйелдерде онкологиялық аурулар бойынша екінші орында, жыл сайын осы қатерлі дерттің 2000-нан астам жаңа жағдайы тіркеледі. Алматыда 2023 жылы 223 әйелден аталған ауру анықталды. Соңғы онжылдықта ауру 20-30 жас аралығындағы жас келіншектерде жиі кездеседі», - деді дәрігер.
Ұлттық онкорегистрдің деректері бойынша Алматыда жатыр мойны обырының 55% - ы бірінші кезеңде анықталады. Сарапшылар аурудың ерте диагностикасының өсуі оны ерте анықтауға бағытталған скринингтік бағдарламамен байланысты екенін атап өтті.
Сондай-ақ қауіпті дерт адам папиллома вирусы арқылы пайда болатындықтан, вакцина арқылы алдын алуға болады.
«Биыл жаңа оқу жылынан бастап, ата-анасының келісімімен, 11 жастан асқан жасөспірім қыздарға жатыр мойны обырына қарсы вакцина тегін салынады. Жатыр мойны обырына қарсы вакцинация әртүрлі елдерде осы аурудан болатын сырқаттанушылық пен өлімді 70-97% - ға төмендетуге мүмкіндік берді. Жаппай вакцинацияның негізгі контингенті - 9-13 жас аралығындағы жасөспірім қыздар. Бұл жас жыныстық белсенділік басталғанға дейін вакцинация үшін таңдалады, өйткені оның 10 жасында басталу жағдайлары бар. АҚШ-тағы зерттеулер көрсеткендей, жасөспірімдердің 2% - ы жыныстық қатынасты 10-11 жасында бастайды», - деді ол.
Айтуынша, әйелдерге жыныстық қатынас басталғанға дейін вакцина алу ұсынылады.
«Бүгінгі күні жатыр мойны обырына қарсы бес вакцина бар: екеуі екі валентті, екеуі төрт валентті және біреуі тоғыз валентті. Барлық вакциналар ДДҰ мақұлдаған және қауіпсіз деп саналады», — деді спикер.
