"-50%", "1+1", "Соңғы мүмкіндік" деген жазулар кез келген сатып алушыны қызықтырады. Бірақ жеңілдіктердің артында жиі маркетингтік айла-шарғылар жатады. Кейде "үнемдедім" деген оймен керексіз дүниеге артық ақша жұмсап жібереміз. Осы тұста ақылды шопинг жасау — қаржылық сауаттылықтың бір бөлігі екенін ұмытпау маңызды, - деп хабарлайды Massaget.kz тілшісі.
Сурет: istockphoto.com
Алдын ала тізім құрыңыз. Саудаға шықпас бұрын өзіңізге нақты не керек екенін жазып алыңыз. Бұл эмоционалды сатып алулардан сақтайды. Егер сауда жасап жүріп, тізімде жоқ зат алғыңыз келсе, оны кейінірек сатып алу үшін жеке белгілеп қойыңыз.
Әр сатып алудың алдында өзіңізге мына сұрақтарды қойыңыз: "Бұл маған шынымен керек пе?", "Мен оны 3 айдан кейін де қолданам ба?", "Егер жеңілдік болмаса, сатып алар ма едім?". Осы сұрақтар импульсивті әрекеттердің алдын алады. Нағыз қажетті зат ешқандай жеңілдіксіз де сізге пайдалы болады.
Жарнаманың тұзағына түспеңіз. "Тек бүгін", "Соңғы 5 дана қалды", "Қоймадағы соңғы түстер" деген сияқты сөздер – сатып алушыны асықтыру үшін арнайы жасалған тәсілдер. Көп жағдайда бұл шындыққа жанаспайды. Маркетингтің мақсаты – сізді ойландырмай әрекет жасатқызу.
Бағаны салыстыруды ұмытпаңыз. Жеңілдік беріп жатқан дүкеннің бағасы басқа жерде әуелден арзан болуы мүмкін. Бір өнімді бірнеше сайттан немесе дүкеннен қарау – өте қарапайым, бірақ тиімді әдет. Сонымен қатар, кей қосымшалар мен браузер кеңейтімдері жеңілдік алдындағы бағасын көрсетіп береді.
Бюджетті алдын ала белгілеңіз. Киімге, косметикаға немесе басқа тауарларға ай сайын бөлуге дайын соманы нақтылап алыңыз. Осы шектеуден шықпау – ақылды шопингтің басты қағидаларының бірі. Ал карта емес, қолма-қол ақша пайдалану — жұмсау психологиясын бақылауға мүмкіндік береді.
Уақытша эмоция – тұрақты шығын. Көңіл-күй түсіп тұрғанда немесе өзіңізді марапаттағыңыз келгенде шопингке жүгіну — қысқа уақыттық қана қанағаттану береді. Бірақ ол қаржылық тәртіпті бұзады. Эмоциямен емес, логикамен сатып алу – нағыз ересек таңдау.
Сапаға мән беріңіз. Арзан дүниенің сапасы да төмен болады. Жиі сынатын, тез тозатын заттар сізді қайта-қайта шығынға ұшыратады. Ал сапалы тауар – ұзақмерзімді инвестиция. Сатып аларда "ұзақ қолданам ба?" деген сұраққа жауап беріңіз.
Ақылды шопинг — өзіңе шектеу қою емес, керісінше өз қажеттілігіңді түсініп, ақшаны мақсатты жұмсау. Жеңілдік – үнемдеудің кепілі емес. Ең жақсы жеңілдік – өзіңізге шынымен қажет затты ғана алу.
