Жаңа әлеуметтік-экономикалық жағдайлардағы ағымдағы үрдістерге байланысты техникалық шығармашылықты дамыту еліміздің әлеуметтік-экономикалық дамуын жеделдетудің бір түрі болып табылады. Сол себепті келер ұрпағымыз осы бағытта білімді мектеп жасынан бастап алғаны дұрыс. Осы орайда Бөрлі ауданының мектептен тыс жұмыс орталығында техникалық бағыттағы үйірмелер бар. Соның бірі - "Аfto.kz " авто үлгілеу үйірмесі.
Үйірмесі жетекшісі, қосымша білім беру педагогі Рустам Жұмағазиев: - Үйірмеде автомобильдердің кішірейтілген коллекцонерлік түрлерін жасайтынын, сызбалардың жасалу техникасын және жүру жылдамдығын, сонымен бірге машинамен танысу және жасалу технологиясын меңгереді,- дейді. Оның сөзінше, аталмыш үйірме білім алушыларды дизайн және технологиялық қызметке дайындайды және мамандық таңдауға бағыттайды.
Бүгінде "Аfto.kz " авто үлгілеу үйірмесінде 12 білім алушы білім алуда. Мұнда білім алушылар жоғарыда айтып өткендей, машина үлгілерімен танысып, әртүрлі материалдардан (қағаз, картон,пвх т.с.с.) сызбаларын сызып, кесіп, қию, жапсыру, құрастыру, сырлау жұмыстарымен машықтанады. Бір сөзбен айтқанда кішірейтілген көлік коллекцияларын жасайды, не болмаса қиялдарына ерік беріп, өз ойларындағы көліктерді құрастырады екен. Жасаған көліктері басқарғыш құралмен (пульт) басқарылып, жүреді.
Үйірмеге қызығушылықпен келген білім алушылардың бірі - Тілекқабыл мен Әбілмансұр. Балақайлардың коллекциясы түрлі машиналарға толы. Жеңіл түрі, жүк тиегіш, автобус дейсіз бе, әйтеуір көліктің неше атасы бар. Олар болашақта түрлі құрылымдағы тиімді машина жасап шығарғылары келетінін де жасырмады.
Жасалған машиналар кәдімгі ойыншық дүкенінің сөрелеріндегілерден асып түспесе кем түспестей. Оны төмендегі суреттерден көруге болады. Пішіні де, түсі де сондай үйлесім тапқан. Машина жасауда балалар біраз ширап қалғандай. Керек құралдарын ұқыптылықпен әрі ыждағаттылықпен пайдалануда. Әрі бәрі шын ықыласпен белсене жұмыстанып жатқанын аңғарасыз.
Мектептен тыс жұмыс орталығы деп аты айтып тұрғандай, балалар сабақтан бос уақытында телефондағы ойындарға емес, осындай пайдалы, керек дүниеге ден қойғанына қуанасың.
Сәнім Меңдібай,
Бөрлі ауданы
zhaikpress.kz
