Жылдағы дәстүрге сай Сырым ауданындағы Ж.Досмұхамедов атындағы мектеп-балабақша-бөбекжайында аудандық “Айбын - 2023” әскери-патриоттық жастар жиыны өтті.
Күн райының қолайсыздығына қарамастан әскери жиынға 13 команда мен 113 оқушы қатысты.
Ашылу салтанатында Сырым аудандық қорғаныс істері жөніндегі бөлім бастығы Мұрат Сәрсеев қатысушыларға сәттілік тілеп, салауатты өмір салтын насихаттау, жастарды әскери-қолданбалы және техникалық даярлау маңызды екенін атап өтті.
Ұл мен қыздар аталған жиында “Smart Sarbaz” өнертапқыштар байқауы, белтемірге тартылу, шалқалап жатып денені көтеру, пневматикалық мылтықтан ату, автоматты бөлшектеу және жинақтау, газтұтқышты және жалпы әскери қорғаныс жиынтығын кию, әскери кросс, “Айбын жұлдызы” бойынша бақ сынасты.
Нәтижесінде, командалық есепте ІІІ орынды В.И.Шубин атындағы жалпы білім беретін орта мектебінің оқушылары, Қ.Мырзалиев атындағы орта мектебінің командасы ІІ орынға қанағат тұтса, І орынға А.Жұмағалиев атындағы орта мектеп-балабақша-бөбекжай кешені лайық деп танылды.
Жеңімпаздарға кубок және жүлдегерлер диплом табысталды.
Айжан Бауыржанқызы,
