Соңғы күндері ауа райы күрт бұзылып, облыстың кейбір аудандары мен қаланың өзінде қар жауса, кей аудандарда жауын-шашын болып, көптеген келеңсіздіктер орын алуда. Бірнеше күннен бері жауған жаңбырдың салдарынан Жәнібек ауданы мен облыс орталығына қатынайтын айналма жолдарда мәселелер туындады. Осы орайда бүгін аудан әкімдігінде ZOOM платформасы арқылы облыс орталығымен, яғни облыс әкімінің орынбасары Темірхан Меңдіғалиевтің төрағалығымен жиын өтті.
Оған облыстың барлық аудан әкімдері мен мекеме-ұйым басшылары және Жәнібекке Бөкей ордасы ауданы арқылы келген «ҚазАвтоЖол» АК» ҰҚ БҚО филиалының директоры Қазбек Мәмбетов қатысты. Қазыбек Ермекұлы республикалық маңызы бар жолдың үш учаскесі, яғни 46-51, 71-73, 92-95 шақырымындағы айналма жолдар қиындық тудырып отырғанын айтып, әзірге аталмыш учаскелерге 3 автогрейдер бекітіп қоятынын жеткізді. Сонымен қатар жолдың 53-95 шақырымында көліктер батып қалған жағдайда учаске басшысы Елдар Биниязовқа +7 777 060 42 82 телефоны арқылы хабарласуға болады.
Гүлзара Мәди,
Жәнібек ауданы
zhaikpress.kz
