Былтыр Достық ауылдық округіндегі салық түсімі 214 пайызға орындалды. Яғни 30 млн теңгедей салық жиналып, оның жартысына жуығының есебінен бюджет дефициты жабылды. Бұл туралы аталмыш ауылдық округтің әкімі Әбубәкір Төлеуов аудандық мәслихаттың 21-сессиясында жасаған есебінде мәлімдеді.
Оның сөзіне қарағанда, округте біраз инвестициялық жобалар сәтті жүзеге асуда. Олардың арасында сүт пен ет өнімдерін өндіру, балық өсіру, бордақылау алаңын салу, жеке балабақша құрылысы, пластик терезесі мен ағаш бұйымдарын жасау секілді жобалар бар.
- Достық ауылына 8,2 шақырым жол салу үшін 2024-2025 жылдарға 1 млрд 55 млн теңге қаржы бөлінді. Ауылішілік жолдың былтыр 3 шақырымы төселді. Қалғаны осы жылы жалғасады. Ауылға жаңа 272 электр бағаны орнатылып, электр желісі сип сымдарына ауыстырылған. Сөйтіп округ орталығында бағандардың елу пайызы жаңартылды. Биыл ауылдағы тозығы жеткен үш трансформатор жаңартылмақшы. Аудандық бюджеттен бөлінген 7 млн теңге жаңа трансматорлар алынды, - деді Әубәкір Қамбарұлы.
Осындай есепті Переметный ауылдық округінің әкімі Алексей Герасимов те берді. Оның айтуынша, округтің экономикалық көрсеткіші жаман емес. Былтырғы қаржылық жоспар 152 млн теңге болса, жыл соңында ол 118,5 пайызға орындалды. Соның ішінде салықтан түскен қаржы 63,3 млн теңгені құрап отыр.
- Былтыр орын алған су тасқынына байланысты округта біраз іс-шаралар жүргізілді. Мәселен, Калинин ауылында жасанды бөгет соғылды. Соның арқасында көп су жинап алдынды. Бұл бөгет Переметный ауылындағы М.Әуезов пен Жеңіс көшелерін су басудан сақтайтын болады. Переметный мен Калинин ауылдарында көлемі 2842 метр болатын арықтар қазылып, тереңдетілді. Қаражар мен Поливной ауылдарындағы Дөркөл өзені маңындағы бөгеттер қалпына келтірілді,-деді Алексей Викторович.
Депутаттар тарапынан аталмыш екі ауыл әкіміне де сұрақ та, сын-сын ескертпе де көп болды. Дегенмен де халық қалаулылары олардың өздеріне жүктелген функциялар мен міндеттерді орындау туралы есепті баяндамаларын назарға алды.
Жалпы сессия барысында 31 мәселе қаралды.
Серік Маратұлы
Бәйтерек ауданы
