Бөрлі аудандық жұмыспен қамту және әлеуметтік бағдарламалар бөлімінің қолдауымен, “Жас қанат” жастар қоғамдық бірлестігінің ұйымдастыруымен мүгедектігі бар тұлғаларды әлеуметтендіру жобасы аясында, мүмкіндігі шектеулі жандарға арналған қайырымдылық шарасы өтті.
Мейірбандық айлығы аясындағы бұл шарада аудан әкімінің орынбасары А. Тоғжанов бастап сөз алып, кейін жұмыспен қамту және әлеуметтік бағдарламалар бөлімінің басшысы О. Басимова, “Жас қанат” жастар қоғамдық бірлестігінің төрағасы С. Исламғали жиналғандарға ізгі тілектерін жеткізді.
Шара барысында қамкөңіл жандарға дастарханнан дәм ұсынылып, елдің сәлемі ретінде шағын концерт қойылды. Сондай-ақ шақырылған жандар өздері де өнер көрсетіп, ортада көңілді би биледі.
Әдемі етіп тізіле қойылған өз қолдарынан шыққан қолөнер көрмесі де шара көркіне көрік қосып тұрды. Қайырымдылық шарасы түстен соң Бөрлі арнаулы әлеуметтік қызмет көрсету орталығында жалғасады.
Сәнім Меңдібай,
Бөрлі ауданы
