Ақжайық ауданы орталығында балалардың жаңа бөбекжайы ашылды.
«Кемеңгер» деп аталған балабақшаның құрылысына жергілікті кәсіпкер Нұрхат Досқалиев өз қаражатынан 230 млн теңге инвестиция салып, көркімен көз тартқан ғимаратты тұрғындардың игілігіне берді.
Балабақшаның ашылуына аудан басшысы М.Сердалин қатысып, туған жерге туын тіккен кәсіпкерге құрмет көрсетіп, алғысхат табыстады.
Мектепке дейінгі білімнің сапасын арттыруда ауданда ауқымды істер атқарылып жатыр. Соның бір көрсеткіші Чапаев ауылының өзінде төрт бірдей жеке балабақша жұмыс істеуде. Жылдың соңында осылардың қатарына қосылған «Кемеңгер» балабақшасында 150 ұл-қызға білім мен тәрбие беруге толық жағдай жасалған. Сабақ оқитын, ауқаттанатын, демалып, ойын ойнайтын бөлмелер, сонымен қатар жатын бөлме қарастырылған. Балабақша иесі ғимараттың безендірілуі, жабдықталуы, оқу құралдары, ойыншықтармен қамтылуына аса назар аударғаны байқалады.
– Балабашқа салу оңай іс емес, салмағы ауыр, осы құрылысқа кірісерде, балалармен ата-аналарға берер пайдасын алға шығардым. Аудандағы іргелі бөбекжай басшыларымен кеңесіп, жүзеге асырылған іс болды. Бұл ретте асығуға мүлдем болмайды, сондықтан құрылыс материалдарының сапалысын таңдап, жаңа ғимараттың қауіпсіздігін қамдап, 3 жыл бойы салдық, - дейді Н.Досқалиев.
Жаңа балабақшада алты топта 150 баланы мектепке дейінгі біліммен қамтамасыз етуге мүмкіндік бар. Жұмыссыздар санатынан мұнда 16 адам қызметке тартылды.
Азамат Қанапия
Ақжайық ауданы
