Ақжайықта әлеуметтік қорғау жүйесі қызметкерлеріне құрмет көрсетілді

Қазан айының соңғы жексенбісінде еліміз әлеуметтік қорғау жүйесі қызметкерлерінің кәсіби мерекесін атап өтеді.

Осы мереке қарсаңында Ақжайық ауданында «Қарттарым – қазынам» тақырыбында басқосу өтіп, оған сала ардагерлері арнайы шақырылды.  

Оларды аудан әкімі Мұрат Сердалин құттықтап, сый-сияпатын ұсынды. Емен жарқын әңгмелесіп, көркемөнерпаздар шырқаған тамаша әндерді тыңдап, көңілдері көтерілген үлкендер өткен күндердегі қызметтерінің қиындығы мен қызықтарын ақтарып, ұйымдастырушыларға ризашылықтарын арнады.

Сөз алған аудандық ардагерлер кеңесінің төрағасы Максим Үмбеталиев аға буын өкілдеріне амандық, денсаулық тіледі.

Сонымен қатар осы күні салада абыройлы еңбек етіп жүрген мамандарды марапаттау рәсімі өтті.

Аудан әкімі алдыңғы қатардан көрінген бірқатар мамандарға Батыс Қазақстан облыстық жұмыспен қамтуды үйлестіру және әлеуметтік бағдарламалар басқармасы басшысының және өз атынан алғысхат табыстады.

Құттықтау сөз алған «АMANAT» партиясы аудандық филиалының төрағасы Артур Ермұқанов, аудан әкімі аппаратының басшысы Айбат Төлегенов, аудандық жұмыспен қамту және әлеуметтік бағдарламалар бөлімінің басшысы Фархад Уахитов, Ақжайық арнаулы әлеуметтік қызмет көрсету орталығының басшысы Асылбек Сапарғалиевтер саладағы жас буын өкілдеріне өз алғысхаттарын берді.

Әсет Орынғали

Ақжайық ауданы