Теректі аудандық мәдениет үйінде «Ару ана - 2022» атты әлеуметтік қызметкерлер арасында байқау оздырылды.
Ұлттық құндылықтарымызды әсемдікпен ұштастырған өнер додасында 7 ауылдық округтің қызметкерлері бақ сынады. Олардың қатарында жалғызбасты қарияларға арнаулы әлеуметтік көмек көрсетіп жүрген Әсел Мамаева (Ақжайық а.о), Сәуле Ағниязова (Подстепный а.о), Ақмарал Рахмешова (Шаған а.о), Айжан Сағынғалиева (Федровка а.о), Айымгүл Табишова (Барбастау ауылы) және ерекше жандарға қол ұшын беріп жүрген Жансая Серікова (Шаған а.о), Альбина Теміршеевалар (Подстепный а.о) бар.
Әділ қазылардың құрамында аудандық «Теректі жаңалығы» газетінің редакторы Әділет Орынбасаров, Теректі аудандық мәдени-демалыс орталығының әдістемелік бөлім меңгерушісі Айгүл Қайырова, аудандық орталықтандырылған кітапханалар жүйесінің аудармашысы Гүлайым Амановалар болды.
Шара барысында сөз алған Теректі аудандық жұмыспен қамту және әлеуметтік бағдарламалар бөлімінің басшысы Арайлым Тасенова қатысушы мамандарға жылы лебізін білдірді.
Бес кезеңнен құралған сайыс нәтижесінде, өнерімен оқ бойы озық болған Подстепныйдың әлеуметтік қызметкері Альбина Серікқызы «Ару ана—2022» аталымын жеңіп алды.
Барша қатысушыларға түрлі аталымдар бойынша марапат ұсынылып, бағалы сыйлықтар табысталды.
Балнұр Қуанышқызы,
Теректі ауданы
zhaikpress.kz
