Жаңақала аудандық мәдени-демалыс орталығының ұйымдастыруымен өткен «Жаңа дауыс» аудандық музыкалық жас талант байқауында Пятимар жалпы орта білім беретін мектебінің 11-сынып оқушысы, жас өнерпаз Нұршат Сабыр, Ұлпан Тастемірованың жетекшілігімен ән додасының финалисі атанған болатын.
Жуырда ол Орал қаласында өткен «Дала сазы» байқауында “Вокал” жанры бойынша бас жүлдеге ие боп, Біріккен Араб Әмірліктеріндегі Дубай қаласына жолдама алды. Ағымдағы жылы 7 қаңтарда Дубай қаласында ұйымдастырылған халықаралық «Sound of sea» фестивалінде жерлесіміз ел намысын қорғап, бұл жолы да айы оңынан туып, І дәрежелі лауреат атанды.
Түркияның Ыстамбул және Ыстықкөл жағалауында өтетін халықаралық фестивальге жолдама алған өнерпаздың өнері үстей берсін дейміз.
Айзада Ақбасова,
Жаңақала ауданы
