Жұмыс сапарымен өңірге келген «AMANAT» партиясының атқарушы хатшысы Асхат Оралов партиялық жұмыс тобымен бірге бүгін Теректі ауданында халықпен кездесіп жүр.
«AMANAT» партиясы сайлауалды уәделерін – азаматтардың талап-тілектерін, «аманаттарын» орындауды негізгі басымдықта ұстайды. Және де, сол уәделердің іске асырылуына ықпал етіп, бақылап отырады.
Теректідегі жұмыс сапарында Асхат Оралов Ақсуат ауылдық округіндегі Магистральный ауылында болып, халықпен кездесті. Бұл ауылда тұрғындар соңғы жылдары жиі айтып жүрген екі мәселенің шешімі жайлы сөз болды. Тозығы жеткен, бейімделген ғимараттағы Магистральное мектебіне биыл 108 орындық модульді ғимарат салынады екен. Тағы бір қажеттілік - кіреберіс жол. Небәрі 1,8 км ауылға кіреберіс жол қысқа болғанмен, ауыл тұрғындарының қатынасына қиындық туғызып отыр. Осы жолды жөндеу жоспарланған болатын. Тұрғындармен кездесуде А.Оралов «жол жөндеу жыл аяғына дейін шешіледі» деп қуантты.
Аудан орталығында Асхат Раздықұлының халықпен кездесуі құрылыс басында – жаңадан салынып жатқан емхана орнында өтті.
Аудандағы жалғыз емхана бір кездегі қонақ үйдің ғимаратын бейімдеп, жасақталған болатын. Тар, әрі ескі орында орналасқан емхана тұрғын саны өсіп келе жатқан ауданда халыққа қызмет етуге қуаты да жетпей тұрғаны рас. Осы орайда былтыр аудандық аурухана қасынан жаңа 200 орындық емхана құрылысы басталғанда халық бір қуанған еді. Дегенмен, құрылысы қарқыны халықтың көңілін көншітпей тұр. Осы жайында айтқан тұрғындар аудан орталығындағы жыл сайын жазда қайталанып тұратын ауыз су мәселесін де қозғады.
Ауылдың белсенді тұрғындары жиналған жерде алдымызда тұрған жауапты науқан –Қазақстан Республикасының Конституциясына өзгертулер мен толықтырулар енгізуге байланысты жарияланған референдум жайында пікірлер айтылды.
Балнұр Қанаева,
Теректі ауданы
zhaikpress.kz
